الماتى قالاسىنىڭ اكىمى: مەديتسينالىق قىزمەتتەردىڭ ساپاسى ارتادى

الماتى. قازاقپارات- الماتىدا مەديتسينالىق قىزمەتتەردىڭ ساپاسى ارتادى.

بۇل تۋرالى الماتى قالاسىنىڭ اكىمى باقىتجان ساعىنتايەۆ «دۋمان» ىقشاماۋدانىنىڭ تۇرعىندارىمەن وتكەن كەزدەسۋدە ايتتى، دەپ حابارلايدى قازاقپارات ءتىلشىسى.

شاھار باسشىسى باقىتجان ساعىنتايەۆ مەدەۋ اۋدانى اكىمىنىڭ ەسەپتىك كەزدەسۋىنە قاتىستى. جيىندا سۇلتانبەك الماسبەك ۇلى اۋداننىڭ الەۋمەتتىك- ەكونوميكالىق دامۋى مەن شەشىلگەن ينفراقۇرىلىمدىق ماسەلەلەر تۋرالى باياندادى.

وتكەن جىلى جالپى ۇزىندىعى 33 شاقىرىم بولاتىن 19 كوشەنىڭ سىرتقى جارىقتاندىرۋ جەلىسىنىڭ قۇرىلىسى اياقتالدى. 1084 جارىق نۇكتەلەرى ورناتىلدى. اعىمداعى جىلى 279 كوشەدە جانە 27 اۋلادا 6200 جارىق نۇكتەسىن ورناتۋ جوسپاردا.

قالا اكىمىنىڭ تاپسىرماسى بويىنشا، وتكەن جىلى كەرەي مەن جانىبەك حان كوشەلەرىنىڭ ماسەلەسى شەشىلدى. مۇندا كوشكىن سالدارىنان جەكە ۇيلەردىڭ قۇلاۋ قاۋپى بولعان. قازىرگى ۋاقىتتا بەتكەيدى نىعايتۋ جۇمىستارى اياقتالدى. جول جوندەلىپ، اباتتاندىرۋ جۇمىستارى جۇرگىزىلدى.

سونداي-اق بىرنەشە جىلدان بەرى كوكتەمگى جانە كۇزگى ۋاقىتتا «تەرىسبۇلاق» وزەنىنىڭ بويىنداعى 50 دەن استام جەكە تۇرعىن ءۇيدى سۋ باساتىن. بۇل ماسەلەدە ءوز شەشىمىن تاپتى. وزەن ارناسىن تەرەڭدەتە وتىرىپ، قالپىنا كەلتىرۋ- نىعايتۋ جۇمىستارى جۇرگىزىلدى.

سونىمەن قاتار، 2019 -جىلى مەدەۋ اۋدانىنا قاراستى 52 اۋلاعا كۇردەلى جانە 30 اۋلاعا اعىمداعى جوندەۋ جۇمىستارى جۇرگىزىلدى. بيىل تاعى 41 اۋلا قايتا قالپىنا كەلتىرىلەدى. قالا اكىمىنىڭ تاپسىرماسى بويىنشا «تاۋ- سامال»، «كەڭساي»، «كولساي»، «سۇلۋساي» ىقشاماۋداندارىندا 4 فەلدشەرلىك- اكۋشەرلىك پۋنكت اشىلدى. وسىلايشا 12 مىڭنان استام تۇرعىنعا مەديتسينالىق كومەكتىڭ قولجەتىمدىلىگى قامتاماسىز ەتىلدى.

ەسەپتىك جيىنعا قاتىسقان قالا اكىمى باقىتجان ساعىنتايەۆتىڭ ايتۋىنشا، مەديتسينالىق مەكەمەلەردى جابدىقتارمەن قامتاماسىز ەتۋ ماسەلەسى وزەكتىلىگىن جويعان ەمەس. وتكەن جىلى جۇرگىزىلگەن اۋديت قالانىڭ ەمحانالارى مەن اۋرۋحانالارىنىڭ جابدىقتالۋى نەبارى %20 دى قۇرايتىنىن كورسەتتى.

«سوندىقتان ءبىز قالانىڭ مەديتسينالىق مەكەمەلەرىن جاڭارتۋ مەن قاجەتتى جابدىقتارمەن جاراقتاندىرۋدىڭ ءۇش جىلدىق جوسپارىن ازىرلەدىك. وسىلايشا مەدمەكەمەلەردىڭ جابدىقتالۋىن %90 عا جەتكىزبەكپىز. وسى جىلعا قاراجات ءبولىندى»، - دەدى قالا اكىمى.

كەزدەسۋدى قورىتىندىلاي كەلە، باقىتجان ساعىنتايەۆ تۇرعىنداردى اشىق اڭگىمەسى ءۇشىن العىس ءبىلدىرىپ، مۇنداي كەزدەسۋلەر اكىمدىكتەگىلەرگە تۇرعىنداردىڭ تالاپ-تىلەگىن جاقىنىراق بىلۋگە مۇمكىندىك بەرەتىنىن ايتتى.

«شاعىن ۋچاسكەلەردەگى مۇنداي كەزدەسۋلەر ءار اۋداندا وتۋدە. تۇرعىنداردىڭ بەلسەندىلىگى جەرگىلىكتى سيپاتتاعى پروبلەمالاردى جەدەل شەشۋگە، سونداي-اق قىسقا مەرزىمدى جانە ورتا مەرزىمدى دامۋ جوسپارلارىنا تۇزەتۋ ەنگىزۋگە سەپتىگىن تيگىزەدى»، - دەپ اتاپ ءوتتى باقىتجان ساعىنتايەۆ.