قازاقستاندا مەديتسينالىق بەتپەردەنى ەكسپورتتاۋعا تىيىم سالىندى
بۇل تۋرالى ق ر دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ ايتتى، دەپ حابارلايدى قازاقپارات.
«وسى جەردە ءبىز بەتپەردە وندىرۋشىلەرى مەن ديستريبيۋتەرلەردىڭ ادەپكە ساي ەمەس مىنەز-قۇلقىن اتاپ وتكىمىز كەلەدى: ولار قورلارىن قىتايعا ساتقان، وسىعان بايلانىستى ۇكىمەت ەكسپورتقا تىيىم سالعان. وتاندىق وندىرۋشىلەر حالىقتىڭ سۇرانىسىن قامتاماسىز ەتە الماي وتىرعاندىعىنا بايلانىستى، شەتەل وندىرۋشىلەرىنەن بەتپەردە ساتىپ الۋ قاراستىرىلۋدا»، - دەيدى د. احمەتشارىپ.
سونداي-اق، دەنساۋلىق ساقتاۋ مينيسترلىگى جرۆي بولماسا بەتپەردە كيۋدىڭ قاجەتى جوق ەكەنىن اتاپ ايتتى.
«ەگەر دەنىڭىز ساۋ بولسا، بەتپەردە كيۋدىڭ قاجەتتىلىگى جوق ەكەنىن تاعى ءبىر مارتە ەستەرىڭىزگە سالامىز»، - دەيدى ول.
ەسكە سالا كەتسەك، بۇعان دەيىن قىتايدان كەلگەن قازاقستاندىق جانە شەتەلدىك ازاماتتاردان كوروناۆيرۋس انىقتالماعانى تۋرالى حابارلاعان ەدىك.
