پرەزيدەنت الەۋمەتتىك كاسىپكەرلىك باستاماسىن قولدادى - ەمين اسكەروۆ
بۇل تۋرالى پرەزيدەنتپەن كەزدەسۋدەن كەيىن كاسىپكەر ەمين اسكەروۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىن پرەزيدەنت الەۋمەتتىك كاسىپكەرلەرمەن كەزدەستى. كەزدەسۋ بارىسىندا كاسىپكەرلەر الەۋمەتتىك ماسەلەلەردى قالاي شەشەتىنىن ايتىپ بەردى. اتاپ ايتقاندا، اڭگىمە حالىقتىڭ الەۋمەتتىك وسال توپتارىنان شىققان ازاماتتاردى جۇمىسپەن قامتۋ جانە باسقا دا ماسەلەلەر تۋرالى ايتىلدى. پرەزيدەنت ءبىزدىڭ باستامالارىمىزعا بەلسەندى تۇردە قولداۋ ءبىلدىرىپ، مەملەكەت بيزنەسپەن قاتار، الەۋمەتتىك ماسەلەلەردى شەشۋگە قاتىساتىن كاسىپكەرلەرگە بارلىق قولداۋ كورسەتىلەتىنىن ايتتى. پرەزيدەنت سونىمەن قاتار ۇستىمىزدەگى جىلدىڭ قازان ايىنىڭ سوڭىندا الەۋمەتتىك كاسىپكەرلەر فورۋمىن ۇيىمداستىرۋعا بولاتىنىن جەتكىزدى. وعان مەملەكەت باسشىسى بيزنەستىڭ وسى سالاسىنا سەرپىن بەرۋ ءۇشىن قاتىسادى»، - دەدى ەمين اسكەروۆ.
ونىڭ ايتۋىنشا، پرەزيدەنتپەن كەزدەسۋگە ءۇش الەۋمەتتىك كاسىپكەر قاتىسقان. ولارمەن اڭگىمە بارىسىندا قاسىم-جومارت توقايەۆ بۇكىل ەل بويىنشا الەۋمەتتىك كاسىپكەرلىكتىڭ باعىتىن دامىتۋ قاجەتتىگىن، مەملەكەت بۇل ماسەلەنى شەشەتىنىن، ياعني دامۋعا جاعداي جاسايتىنىن اتاپ ءوتتى.
سونداي-اق، كاسىپكەر كەزدەسۋ بارىسىندا مەملەكەت باسشىسىنا الەۋمەتتىك كاسىپكەرلەردىڭ پروبلەمالارىن كوتەردى. كاسىپكەردىڭ ايتۋىنشا، مۇنداي ەكى ماسەلە بار: ءتيىستى عيمارات پەن الەۋمەتتىك كاسىپكەرلەر ءۇشىن ءبىرىڭعاي ساۋدا نۇكتەلەرىنىڭ بولماۋى. مەملەكەت مۇنداي جۇمىستاردىڭ الەۋمەتتىك باعدارىن ەسكەرە وتىرىپ، جەڭىلدەتىلگەن شارتتارمەن ءۇي-جايلاردى بەرە الادى. سونداي-اق، الەۋمەتتىك كاسىپكەرلەردىڭ كاسىپورنىندا شىعارىلاتىن ونىمدەرگە ارنايى ساۋدا نۇكتەلەرىن ۇيىمداستىرۋعا بولادى. ە اسكەروۆ اتاپ وتكەندەي، پرەزيدەنت ق. توقايەۆ كاسىپكەرلەردىڭ وتىنىشتەرىنە وڭ جاۋاپ قايتارىپ، بۇل ماسەلە قارالاتىنىنا ۋادە بەرگەن.
ەسكە سالساق، مەملەكەت باسشىسى قاسىم-جومارت توقايەۆ الەۋمەتتىك كاسىپكەرلىك وكىلدەرىمەن كەزدەسكەنى تۋرالى بۇعان دەيىن حابارلاعان بولاتىنبىز.
