قازاقستان حوككەيشىلەرىنىڭ وليمپياداعا ىرىكتەۋ ساتىسىنداعى قارسىلاستارى كىمدەر؟
بۇل سىندا H توبىندا قازاقستان، پولشا، ۋكراينا جانە نيدەرلاند جارىستىڭ كەلەسى ساتىسىنا بەرىلەتىن جالعىز جولدامانى ساراپقا سالادى، دەپ حابارلايدى قازاقپارات ءتىلشىسى.
العاشقى قارسىلاسىمىز - ۋكراينا دا الەمدىك حوككەيدە ءوز ورنىن ەنشىلەگەن. 1992-جىلى 14- ساۋىردە وتكەن العاشقى كەزدەسۋىندە ۋكراينا قازاقستاننان 1:5 ەسەبىمەن جەڭىلىپ قالعان بولاتىن. اتالمىش قۇراما وليمپيادا ويىندارىندا 2002-جىلى باق سىنادى. سول جولى جالى كوماندالىق ەسەپتە 10-ورىن الدى. ودان كەيىنگى كەزەڭدە ولاردىڭ اتالمىش بەدەلدى باسەكەگە بىردە-ءبىر مارتە جولى تۇسكەن ەمەس. ال الەم چەمپيوناتىندا توپ-ديۆيزيوندا سول جىلى جالپى كوماندالىق ەسەپتە توعىزىنشى ورىنعا تابان تىرەدى. حالىقارالىق شايبالى حوككەي فەدەراتسياسىنىڭ 2019-جىلعى كورسەتكىشى بويىنشا ۋكراين حوككەيشىلەرى الەمدىك رەيتينگتە 25-ورىندا تۇر. قازاقستان مەن ۋكراينا قۇرامالارى 6- اقپان كۇندەرى ءوزارا شەبەرلىك بايقاسادى.
ەلوردا تورىندە نيدەرلاند قۇراماسى دا جالعىز جولداماعا تالاسادى. نيدەرلاند شايبالى حوككەي فەدەراتسياسى 1935-جىلى تۇساۋىن كەسكەن. العاشقى قۇرىلعان جىلى الەم چەمپيوناتىندا باق سىناپ، ەڭ سوڭعى ورىندى قاناعات تۇتتى. بۇل قۇراما 1980-جىلى وليمپيادا ويىندارىندا جالپى كوماندالىق ەسەپتە سەگىزىنشى ورىنعا قول جەتكىزدى. الەم چەمپيوناتىندا 1950، 1981-جىلدارى سەگىزىنشى ورىن الدى.
ايتا كەتەرلىگى، نيدەرلاند قۇراماسى بۇگىنگى كۇنگە دەيىن 7 مارتە كەزدەستى. ونىڭ بارلىعىندا قازاقستاندىق حوككەيشىلەر جەڭىسكە جەتتى. حالىقارالىق شايبالى حوككەي فەدەراتسياسىنىڭ 2019-جىلعى كورسەتكىشى بويىنشا الەمدىك رەيتينگتە 28-ورىندا تۇر. قازاقستان مەن نيدەرلاند قۇرامالارى 7- اقپاندا مۇز ايدىنعا شىعادى.
پولشادا شايبالى حوككەي فەدەراتسياسى 1926-جىلى قۇرىلعان. بۇگىنگى كۇنگە دەيىن پولياك حوككەيشىلەرى قىسقى وليمپيادا ويىندارىندا 13 مارتە باق سىناعان. بۇل جونىنەن ەڭ جوعارى جەتىستىگى رەتىندە 1932-جىلعى ءدۇبىرلى دودادا ءتورتىنشى ورىن العاندىعىن ايتا كەتكەنىمىز ارتىق بولماس. سونداي-اق، ولار 1931-جىلى پولشانىڭ كرىنيتسا-زدرۋي قالاسىندا وتكەن الەم چەمپيوناتىندا العاشقى تورتىككە تابان تىرەدى. ال 1929-جىلى ەۋروپا چەمپيوناتىندا فينالدا چەحوسلوۆاكيادان 1:2 ەسەبىمەن جەڭىلىپ، كۇمىس جۇلدەنى قاناعات تۇتتى.
حالىقارالىق شايبالى حوككەي فەدەراتسياسىنىڭ 2019-جىلعى كورسەتكىشى بويىنشا ولار الەمدىك رەيتينگتە 22-ورىندا تۇر. ايتا كەتەرلىگى، 1994-2018-جىلدار ارالىعىندا ولار وليمپياداعا جولداماعا قول جەتكىزە الماي كەلەدى. قازاقستان مەن پولشا قۇرامالارى 9-اقپان كۇندەرى كەزدەسەدى.
ءوز توبىندا قازاقستاندىق حوككەيشىلەر ءبىرىنشى ورىن الۋى ءتيىس. سول ارقىلى ىرىكتەۋ كەزەڭىنىڭ فينالدىق ساتىسىنا جولداما الادى. جارىستىڭ اتالمىش ساتىسىندا قازاقستاندىق حوككەيشىلەر 2020-جىلدىڭ 27-30-تامىز ارالىعىندا سلوۆاكيا، نورۆەگيا، لاتۆيامەن شەبەرلىك بايقاسادى.
قازاقستان قۇراماسى قىسقى وليمپيادا ويىندارىندا ەكى مارتە باق سىنادى. 1998-جىلى شيرەك فينالعا دەيىن جەتسە، 2006-جىلى جالپى ەسەپتە توعىزىنشى ورىن الدى.
