ا ق ش: ورتالىق ازياداعى وزگەرىستەر جاڭا مۇمكىندىكتەرگە جول اشادى

نۇر-سۇلتان. قازاقپارات - ورتالىق ازيا ەلدەرىندە بيلىكتىڭ اۋىسۋى جانە بەس مەملەكەت اراسىندا ءوزارا بايلانىستىڭ نىعايۋى ۆاشينگتوننىڭ ورتالىق ازيا ايماعىمەن قارىم-قاتىناستى تەرەڭدەتۋگە كوبىرەك مۇمكىندىك اشادى دەپ مالىمدەدى ا ق ش بيلىگى.

ا ق ش ورتالىق ازيادا سوڭعى بەس جىلدا بولعان جاڭا وزگەرىستەردى ەسكەرە وتىرىپ، ءوزىنىڭ ايماقتىق ستراتەگياسىن جاڭارتتى دەدى ا ق ش مەملەكەتتىك حاتشىسىنىڭ وڭتۇستىك جانە ورتالىق ازيا ىستەرى بويىنشا كومەكشىسىنىڭ ورىنباسارى ەليس ۋەللس 5- اقپاندا.

«ءبىز جاڭا مۇمكىندىكتەر كەزەڭىنە كۋا بولىپ وتىرمىز» دەدى ەليس ۋەللس. مايك پومپەونىڭ ايماققا ساپارىنان كەيىن ۋەللس وسىنداي مالىمدەمە جاسادى.

پرەزيدەنت دونالد ترامپ اكىمشىلىگى ەۋروپا مەن ازيانى جالعاپ تۇرعان شيكىزات رەسۋرسىنا باي ورتالىق ازيا ايماعىندا قىتاي جانە رەسەيمەن قاتار ءوز ىقپالىن ارتتىرۋ جولىن ىزدەپ جاتىر. بۇعان قوسا ا ق ش كورشى اۋعانستاندا جيىرما جىلعا جۋىق سوزىلعان سوعىستى اياقتاۋعا كۇش سالىپ جاتقاندىقتان ورتالىق ازيامەن قارىم-قاتىناس ورناتۋعا مۇددەلى.

ورتالىق ازيانىڭ بەس مەملەكەت باسشىلارى 2018-جىلى سوڭعى ون جىلدا تۇڭعىش رەت ءوزارا جينالىپ، ىنتىماقتاستىقتى دامىتۋ ماسەلەسىن تالقىلاعان. بىلتىر دا بۇل كەزدەسۋ جالعاسىن تاپتى. ۋەللس بۇل باستامانى ماڭىزدى دەپ سانايدى.

«ءبىز ايماقتىق دارالىققا قاتىستى تىڭ كوزقاراستىڭ پايدا بولعانىنا كۋا بولىپ وتىرمىز» دەدى ول.

اق ءۇيدىڭ ۇلتتىق قاۋىپسىزدىك كەڭەسىنىڭ ورتالىق جانە وڭتۇستىك ازيا ىستەرى جونىندەگى وكىلى ليزا كەرتيستىڭ ايتۋىنشا، مۇنداي ايماقارالىق ارىپتەستىك «بەس جىل بۇرىن مۇمكىن ەمەس ەدى» دەيدى.

ا ق ش بيلىگى ورتالىق ازيا ايماعىندا بىرىككەن ەلەكتر جەلىسى سياقتى ايماقتىق ارىپتەستىكتى نىعايتۋعا ىقپال ەتەتىن ورتاق جوبالاردى قولدايتىنىن ءبىلدىردى. بۇعان قوسا، بەس مەملەكەت اراسىنداعى ورتاق ۆيزا، كەدەندىك پروتسەدۋرالار، شەكارا بايلانىسىن دامىتۋ، بيزنەستەگى كەدەرگىلەردى جوياتىن جوبالاردى دا قولدايتىنىن جەتكىزدى.

ولار تاجىكستان مەن قىرعىزستاننان سۋ ەلەكتر ەنەرگياسىن اۋعانستان مەن پاكىستانعا ەكسپورتتاۋ جوسپارىنىڭ جۇزەگە اساتىنىنا ءۇمىت ءبىلدىردى. ا ق ش تارابىنىڭ ويىنشا، بۇل ايماق ەكونوميكاسىنا سەرپىن بەرىپ، اۋعانستانداعى تۇراقتىلىقتى دامىتۋعا كومەكتەسەدى.

ۆاشينگتون بۇرىنعىشا ورتالىق ازياعا قاتىستى نەگىزگى ۇستانىمىن وزگەرتپەيدى – ا ق ش ايماقتاعى تۇراقتىلىقتىڭ ساقتالۋى مەن ءبىر بيلىككە تاۋەلدى بولماۋدى قولدايدى دەدى.

ينفراقۇرىلىمدىق جوبالارى ءۇشىن قىتايدان نەسيە الىپ، قارىزعا باتقان تاجىكستان جانە قىرعىزستان سياقتى داۋلەتتى ەمەس مەملەكەتتەردىڭ قارىزدان قۇتىلۋى قيىن بولۋى مۇمكىن. ينفراقۇرىلىمدىق جوبالاردى دامىتۋ نەمەسە مەملەكەتتى كورشى ەلگە تاۋەلدى قىلۋ سياقتى كۇردەلى ماسەلەلەردى شەشۋ بويىنشا ۆاشينگون و ا ەلدەرىنە قولۇشىن بەرۋگە دايىن دەيدى اقش بيلىگى.

ا ق ش- تىڭ پىكىرىنشە، ورتالىق ازيادا ينۆەستيتسيا كليماتىنىڭ جاقسارۋى زاڭ ۇستەمدىگىن كۇشەيتۋ بويىنشا رەفورمالاردى ءتيىمدى جۇزەگە اسىرۋعا بايلانىستى. ليزا كەرتيس ورتالىق ازيا باسشىلارىن «اشىق ساياسي جۇيە ورناتىپ، تۇراقتى سايلاۋ وتكىزىپ» دەموكراتيالىق پروتسەستەردى جاقسارتۋعا شاقىردى.

«ازاتتىق»