بيىل تەمىرتاۋ قالاسىندا قانداي وزگەرىستەر بولادى - اكىم ەسەبى

قاراعاندى. قازاقپارات - تەمىرتاۋ قالاسىنىڭ اكىمى عالىم ءاشىموۆ تۇرعىندار الدىندا ەسەپ بەردى. جۇرتشىلىقپەن كەزدەسۋگە قاراعاندى وبلىسىنىڭ باسشىسى جەڭىس قاسىمبەك تە قاتىستى، دەپ حابارلايدى قازاقپارات ءتىلشىسى.

تەمىرتاۋلىقتار ەكولوگيا، جىلۋ، سۋمەن قامتاماسىز ەتۋ، قوعامدىق كولىك جانە باسقا دا الەۋمەتتىك ماسەلەلەر تۋرالى سۇرادى. اتاپ ايتقاندا، تۇرعىندار تەمىرتاۋ قالاسىنىڭ اكىمىنە عانا ەمەس، قاراعاندى وبلىسىنىڭ باسشىسىنا دا ءوز سۇراقتارىن جولدادى.

جەڭىس قاسىمبەك 2019 -جىلى وڭىردە قول جەتكىزىلگەن جەتىستىكتەر جايلى ايتىپ، جاقىن ارادا مەتاللۋرگتەر قالاسىنا قاتىستى كوزدەلىپ وتىرعان ناقتى جوسپارلار تۋرالى جەتكىزدى.

«بيىل تەمىرتاۋدا كوپقاباتتى تۇرعىن ۇيلەردەگى ليفتتەردى اۋىستىرۋ بويىنشا اۋقىمدى باعدارلامانى ىسكە قوسامىز. قالادا جۇمىس ىستەمەيتىن بارلىعى 196 كوتەرگىش بار.

جىلدار بويى سىزدەر توعىزىنشى قاباتقا جاياۋ كوتەرىلۋگە ۇيرەنىپ قالعان شىعارسىزدار. بۇل، ارينە، دۇرىس ەمەس. بيىل 59 ليفت، ال كەلەسى جىلى 67 ليفت اۋىستىرىلاتىن بولادى. قالعاندارىن 2022 -جىلى جاڭارتامىز. سونداي-اق، وسى جىلدان باستاپ قوعامدىق كولىكتى جاڭارتۋعا كىرىسەمىز. سىزدەر وزدەرىڭىز كورىپ وتىرسىزدار، قازىرگى جۇمىس ىستەپ جاتقان اۆتوبۋستار ەشبىر سىن كوتەرمەيدى - ولار ەسكى جانە جايلى ەمەس. تەمىرتاۋدا كۇن سايىن 200 اۆتوبۋس جولعا شىعادى. الداعى جىلدارى بارلىعىن اۋىستىرۋدى جوسپارلاپ وتىرمىز»، - دەدى ايماق باسشىسى.

سونىمەن قاتار، ول اعىمداعى جىلى تەمىرتاۋ قالاسىندا جانە ءوڭىردىڭ بارلىق ايماعىندا تۇرعىن ۇيلەر مەن الەۋمەتتىك نىساندار قۇرىلىسىنىڭ كولەمى ۇلعاياتىنىن اتاپ ءوتتى. وسى جىلدىڭ ناۋرىز ايىندا قالادا 20 مىڭ ادامعا ارنالعان ەمحانا جۇمىس ىستەي باستايدى. ءساۋىر ايىندا 320 كورەرمەنگە ارنالعان دەنە شىنىقتىرۋ- ساۋىقتىرۋ ورتالىعى اشىلادى. نىساندار «ارسەلورميتتال تەمىرتاۋ» قارجىسى ەسەبىنەن سالىنىپ جاتىر.

كەزدەسۋگە كەلگەن قالا تۇرعىندارىن ەكولوگيا جانە كوگالداندىرۋ ماسەلەسى قىزىقتىردى. بۇل باعىتتاعى جۇمىستار جانە قارا قار ماسەلەسى قالاي شەشىلىپ جاتقانى تۋرالى تەمىرتاۋ قالاسىنىڭ اكىمى عالىم ءاشىموۆ بايانداپ بەردى.

«بۇل ماسەلە تۇراقتى باقىلاۋدا. قالاداعى ەكولوگيالىق جاعدايدى جاقسارتۋ بويىنشا ءۇش جىلدىق كەزەڭگە ارنالعان كەشەندى جوسپار ازىرلەندى. جەكە سەكتوردى گاز وتىنىنا كوشىرۋ بويىنشا ءىس- شارالار جوسپارلانعان. ول ءۇشىن «سارىارقا» ماگيسترالدى گاز قۇبىرى سالىنادى. قازىر ءبىرىنشى كەزەكتەگى قۇرىلىس جۇمىستارى ءجۇرىپ جاتىر، جاقىن ارادا الەۋمەتتىك قالا شاعىناۋدانىندا جانە وترادنوە كەنتىندە 700 جەكە ءۇي گازداندىرىلادى. بۇل ەكولوگيالىق پروبلەمالاردىڭ كوپ بولىگىن شەشۋگە كومەكتەسەدى»، - دەدى ول.

عالىم ءاشىموۆ وتكەن جىلى قالادا 3984 اعاش وتىرعىزىلعانىن حابارلادى.

تەمىرتاۋلىقتار سۋمەن قامتۋ ماسەلەسىن دە قوزعادى. ەسكى قالا شاعىناۋدانىنداعى كوپقاباتتى ۇيلەردىڭ تۇرعىندارى جاز ايلارىندا سۋدىڭ قىسىمى وتە تومەن جانە ىستىق سۋدىڭ بولمايتىنىنا شاعىمداندى. قالا اكىمى ماماندارعا قاجەتتى ولشەۋلەر جۇرگىزۋدى تاپسىردى جانە بيىل قالادا سۋ قۇبىرى جەلىلەرىن اۋقىمدى قايتا قۇرۋ باستالاتىنىن ءمالىم ەتتى.

«بۇرىن كوپتەگەن جەلىلەر يەسىز بولعان، ءبىز ولاردى جوندەۋگە مەملەكەتتىك بيۋدجەتتەن اقشا جۇمساي المادىق. ءبىز ۇلكەن جۇمىس جۇرگىزدىك، بارلىق جەلىلەردى پاسپورتتادىق، ولاردى بالانسقا الدىق، جوندەۋ جانە جاڭعىرتۋ ءۇشىن جوبالاۋ- سمەتالىق قۇجاتتامانى ازىرلەدىك. بيىل جۇمىسقا كىرىسەمىز»، - دەپ ۋادە بەردى ول.

سونداي-اق، قالا تۇرعىندارىن وسى اتاۋلى كۇنگە وراي قالا ستەللاسىن قالپىنا كەلتىرۋ جانە بولاتتىڭ العاشقى قۇيمالارىنىڭ 65 جىلدىق مەرەيتويىن مەرەكەلەۋ ماسەلەلەرى قىزىقتىردى.