اقتاۋدا جاڭا ءۇش جۇزدەي جۇمىس ورنى اشىلادى
اقتاۋ قالاسىنىڭ اكىمى عالىمجان نيازوۆتىڭ ايتۋىنشا، 2019 -جىلى بيتۋم نەگىزىندە قاتتى جانە سۇيىق گيدرووقشاۋلاعىش ماتەريالداردى ءوندىرۋ زاۋىتى ىسكە قوسىلىپ، جاڭادان 25 جۇمىس ورنى اشىلدى.
وسى جىلى 3 جوبا: نجينيرينگتىك- بولات كونسترۋكسيالاردى، موبيلدى تەڭىز كونتەينەرلەرىن، كارزەڭكەلەر مەن كومپوزيسيالاردان جانە سكيپتەردەن جوبالاۋ مەن دايىنداۋ بويىنشا مونتاجدىق كەشەن، پوليپروپيلەن قاپتاماسىن، حيميالىق، رەزەڭكە جانە پلاستيكالىق بۇيىمداردى وڭدەۋ زاۋىتى جانە ماشينالار مەن جابدىقتاردان باسقا، مەتاللۋرگيا ونەركاسىبى، دايىن مەتالل بۇيىمدارىن ءوندىرۋ زاۋىتى ىسكە قوسىلىپ، 295 جۇمىس ورنى اشىلادى.
رەسمي دەرەكتەرگە سايكەس، قالا بويىنشا 79,9 مىڭ ادامدى جۇمىسپەن قامتىپ وتىرعان 31011 شاعىن جانە ورتا كاسىپكەرلىك سۋبەكتى جۇمىس ىستەيدى. ول قالانىڭ جۇمىس ىستەۋگە قابىلەتتى تۇرعىندارىنىڭ 84,9 پايىزىن قۇراپ وتىر.
سونداي-اق، وتكەن جىلى 225 جاڭا جۇمىس ورنىن اشاتىن 35 جوبا نەسيەلەندىرىلىپ، 232 ادام كاسىپكەرلىك نەگىزدەرىن وقۋ كۋرستارىنان وتكەن. ازاماتتاردى كاسىپكەرلىككە تارتۋ ماقساتىنداعى «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا 127 جۇمىس ورنى بار 68 جوبا قارجىلاندىرىلادى.
قالادا ازىق- تۇلىك باعاسىن تۇراقتاندىرۋ ماقساتىندا 3 گيپەرماركەت جانە 17 سۋپەرماركەتپەن مەموراندۋم جاساقتالدى. بىلتىر جىل بويىنا 65 رەت اۋىل شارۋاشىلىعى ونىمدەرى جارمەڭكەسى ۇيىمداستىرىلىپ، جاز مەزگىلىندە كاسىپكەرلەردى قولداۋ ماقساتىندا 299 ساۋدا نۇكتەسىنە ورىن بەرىلدى.
قالا باسشىسى حالىقپەن كەزدەسۋىندە كەلتىرگەن مالىمەتكە ساي، بيىل ەگىن ەگۋگە، جىلىجاي سالۋعا تالاپتانعان كاسىپكەرلەردى قولداۋ ءۇشىن قالاعا جاقىن جەردەن 100 گەكتار جەر ءبولىنىپ وتىر. قالانىڭ ساۋلەتتىك كەلبەتىنە كورىك بەرۋ جانە ءتۋريزمدى دامىتۋ ماقساتىندا امفيتەاتر، جاسىل الاڭقايلار، جارقاباقتىڭ تابيعي قالپىن ساقتاي وتىرىپ سالىنعان «جارتاستى سوقپاق» ەل يگىلىگىنە بەرىلدى. زاماناۋي تالاپتارعا ساي «حوليدەي يين» قوناق ءۇيى جانە «دوستار» دەمالىس ورىندارىنداعى اكۆاپاركتەردىڭ ىسكە قوسىلۋى جوسپارلانىپ وتىر.
«ءبىر مەزەتتە مىڭعا جۋىق ادامدى قابىلدايتىن بەس جۇلدىزدى «Rixos» دەمالىس ورتالىعىنىڭ اشىلۋى وسى جىلدىڭ ماۋسىم ايىنا جوسپارلانعان. وسى قوناق ۇيگە قىزمەت ەتەتىن 600 جاڭا جۇمىس ورنى اشىلماق. بۇگىنگى تاڭدا وسى ازاماتتاردى تۋريزم كوللەدجىندە تەگىن وقىتىپ، ونىڭ ىشىنەن 200 ادامدى «Sembol Construction and Engineering» كومپانياسى تاجىريبە الۋعا شەتەلگە جىبەرەدى. كاسىپكەرلىكتى دامىتۋ - جۇمىسسىزدىق دەڭگەيىن تومەندەتۋدىڭ العىشارتى، ءارى نارىقتى دامىتۋدىڭ كەپىلى. سوندىقتان، ءار كاسىپكەرگە قولداۋ مەن قولايلى جاعداي جاساۋ - مىندەت»، - دەدى عالىمجان نيازوۆ.
