الماتى وبلىسىندا كولىك اپاتىنا ۇشىراپ، وقيعا ورنىنان قاشىپ كەتكەن وقۋشى انىقتالدى

تالدىقورعان. قازاقپارات - الماتى وبلىسىنىڭ پوليتسەيلەرى كولىك اپاتىنا ۇشىراپ، وقيعا ورنىنان قاشىپ كەتكەن وقۋشى انىقتادى، دەپ حابارلايدى قازاقپارات ءتىلشىسى.

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وقيعا بىلتىر قاراشانىڭ 7 سى كۇنى تىركەلگەن. ۇيعىر اۋدانىنداعى شارىن اۋىلىندا بەلگىسىز اۆتوكولىك ات ارباسىنا سوعىلعان. سالدارىنان 46 جاستاعى جەرگىلىكتى تۇرعىن زارداپ شەگىپ، ءتۇرلى دەنە جاراقاتىمەن اۋىر حالدە اۋرۋحاناعا جەتكىزىلگەن. كولىك يەسى زارداپ شەگۋشىگە كومەكتەسپەي، وقيعا ورنىنان قاشىپ كەتكەن. جەرگىلىكتى پوليتسەيلەر اتقارعان جۇمىستىڭ ناتيجەسىندە كولىكتى جۇرگىزگەن كۇدىكتى رەتىندە 16 جاستاعى جاس ءوسپىرىم انىقتالىپ، ۇستالدى.

ءتارتىپ ساقشىلارى انىقتاعانداي، كامىلەتتىك جاسقا تولماعان جاس ءوسپىرىم اتا-اناسىنىڭ رۇقساتىنسىز اكەسىنىڭ «مازدا-626» كولىگىن جۇرگىزىپ كەتكەن.

«ءىس تەرگەۋ ساراپتامالارىنىڭ ناتيجەسىن كۇتۋگە وراي جانە دالەلدەمەلەردىڭ جينالۋىنا بايلانىستى سوزىلدى. قازىرگى ۋاقىتتا ق ر ق ك 345-بابى 2-تارماعى جانە ق ر ق ك 347-باپتارى بويىنشا قىلمىستىق ءىس قوزعالىپ. سوتقا جىبەرىلدى»، - دەدى ۇيعىر اۋداندىق پوليتسيا ءبولىمىنىڭ وكىلى سەرىك اينابەكوۆ.

اۆتور: سامال قابىشەۆا