ەلوردادا ءال- فارابيگە ەسكەرتكىش ورناتۋ ۇسىنىلدى

نۇر- سۇلتان. قازاقپارات - جازۋشى تولەن ابدىك ءابۋ ناسىر ءال- فارابيگە ەلوردادا ەسكەرتكىش ورناتۋدى ۇسىندى، دەپ حابارلايدى قازاقپارات ءتىلشىسى.

«ءابۋ ناسىر ءال- فارابي - اريستوتەلدەن كەيىن ەكىنشى ۇستاز اتانعان ادامزات تاريحىنداعى ەڭ عۇلاما ادامداردىڭ ءبىرى. ونىمەن قالاي ماقتانساق تا ارتىق بولمايدى. سوندىقتان، مەنىڭ ۇسىنىسىم: وسى مەرەيتوي قارساڭىندا ءال- ءفارابيدىڭ ەسكەرتكىشىن وسى ەلوردادا ورناتۋعا بولادى. شەتەلدەن كەلگەندەر ەسكەرتكىشكە قاراپ، ونى بىردەن تانيتىن ەدى. ەكىنشىدەن، ءال- فارابيدىڭ مەرەيتويىن يۋنەسكو- مەن قوسىلىپ وتكىزۋگە بولادى»، - دەدى تولەن ابدىك اقوردادا «رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسسيا وتىرىسىندا.

ءوز كەزەگىندە مەملەكەتتىك حاتشى قىرىمبەك كوشەربايەۆ ءابۋ ناسىر ءال- فارابيدىڭ 1150 جىلدىعى يۋنەسكو- نىڭ كۇنتىزبەسىنە كىرگەنىن اتاپ ءوتتى.

«پاريجدە يۋنەسكو- نىڭ باس ديرەكتورىمەن كەزدەسىپ، وسى ماسەلەنىڭ ءبارىن ناقتىلادىق. ابايدىڭ دا، ءابۋ ناسىر ءال- فارابيدىڭ دا مەرەيتويى، شىمكەنت قالاسىنىڭ 2200 جىلدىعى - ءبارى يۋنەسكو- نىڭ قولداۋى اياسىندا وتەدى»، - دەدى ول.

ەسكە سالا كەتسەك، مەملەكەتتىك حاتشى قىرىمبەك كوشەربايەۆتىڭ توراعالىمەن اقوردادا بۇگىن ق ر پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ وتىرىسى وتكىزىلدى.