ءاليحان سمايىلوۆ قازاقستان ەكونوميكاسىنا كوروناۆيرۋستىڭ اسەرى تۋرالى پىكىر ءبىلدىردى
«قازىرگى كەزدە كوروناۆيرۋس قازاقستانعا زالالىن تيگىزبەس ءۇشىن ءتيىستى شارالاردى قابىلداپ جاتىرمىز. ەگەر دە ءبىزدىڭ قادامدار تابىستى بولسا، سونداي- اق وسى پروبلەمالاردان قۇتىلساق، وندا ەكونوميكاعا سالماق تۇسپەيدى. دەگەنمەن دە كورشى ەلدەرمەن اراداعى قارىم- قاتىناستار تۇرعىسىندا راديكالدى شارالاردى قابىلداۋعا ءماجبۇر بولساق (قىتايمەن قاتىناستار بويىنشا) ، بۇل قادامداردىڭ بەلگىلى ءبىر دەڭگەيدە اسەرى بايقالۋى ىقتيمال» ، - دەدى سمايىلوۆ پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ.
سونىمەن قاتار ول ۆيرۋسقا بايلانىستى تۋريزم سالاسىندا ءتيىستى دەڭگەيدە شەكتەۋلەر ورىن العانىن ەسكە سالدى.
«بەلگىلى ءبىر دارەجەدە تۋريستىك ساپارلار شەكتەلگەن، وسى ورايدا اتالعان ەلگە ساپارعا بارۋدان ۋاقىتشا باس تارتۋعا كەڭەس بەردىك. مەنىڭ ويىمشا، بۇل ۆيرۋستى جۇقتىرىپ الۋ قاۋپىنەن ساق بولۋ ءۇشىن ءبىزدىڭ ازاماتتار وسى كەڭەسىمىزگە نازار اۋداراتىن بولادى. قىتايداعى تۋريزمنەن تارتىلعان تابىس وسى ەلدىڭ ەكونوميكاسىنا تۇسەدى. ەگەر ءبىزدىڭ ازامات وندا بارماسا، اقشا ەلىمىزدە قالادى. كەرىسىنشە، بۇل ءۇردىس قازاقستان ءۇشىن جاقسى» ، - دەدى ول.
بۇدان بۇرىن حابارلانعانداي، بۇگىن ماجىلىستە ءا. سمايىلوۆ ەل اۋماعىندا كوروناۆيرۋستىڭ تارالۋىنا جول بەرمەۋگە بولىنگەن قارجى تۋرالى ايتىپ بەردى.
