تاباق تارتۋ ەرەجەلەرىن قانشالىقتى بىلەسىز

نۇر-سۇلتان. قازاقپارات – قىدىرىپ كەلگەن قوناقتىڭ ابىرويىنا قاراي تاباق تارتىلاتىنىن بىرەۋ بىلسە، بىرەۋ بىلمەس.

وسى ورايدا Muslim.kz باسىلىمىنا سىلتەمە جاساپ قاجەتتى كەڭەس ۇسىنادى.

ەت اسقاندا جىلىكتەن بۇزىلعان ەتتى ادام سانىنا قاراي مولشەرلەيدى. وسى ورايدا قويدىڭ ەتىن جىلىكتەپ، ون ءۇش مۇشەگە بولەدى:

ەكى جامباس، ەكى ورتان جىلىك، ەكى اسىقتى جىلىك، بەل ومىرتقا، ەكى سۇبە، سونداي-اق قابىرعا، ءتوس، ومىرتقا، ەكى جاۋىرىن، ەكى توقپان جىلىك، بۇعانا مەن مويىن.

كوبىنەسە سىيلى قوناقتارعا مالدىڭ باسىن، قازى-قارتا، جال-جايانى تاباققا بىرگە سالىپ بەرەدى.

قازاق حالقىندا سىيلى جانعا تارتىلاتىن تاباقتىڭ ءتۇرى كوپ.

ولارعا باس تاباق، قوس تاباق، سىي تاباق، كۇيەۋ تاباعى، كەلىن تاباعى، جاستار تاباعى، جاي تاباق جانە تاعى باسقالارى جاتادى.

باس تاباق

جاسى ۇلكەن قارتتارعا، اسا سىيلى قوناقتارعا تارتىلادى. وعان سالىناتىن كادەلى مۇشەلەر: باس، جامباس، ورتان جىلىك، بەلدەمە، سۇبە قابىرعا، قويدىڭ ۇلتابارى، جىلقى ەتىنەن قازى-قارتا، جال-جايا.

قوس تاباق

قۇدا-قۇداعيلارعا تارتىلاتىن ارنايى تاباق. ونىڭ كادەلى مۇشەلەرى باس تاباقپەن پارا-پار. ونىڭ قوس تاباق دەپ اتالاتىن سەبەبى، قۇدا-قۇداعيعا كوپشىلىكپەن بىرگە ۇسىنىلعان قوناقاسىنىڭ ۇستىنە قوسىمشا تارتىلاتىندىعى. قوستاباقتىڭ كادەلى مۇشەسى - توقپان جىلىك.

سىي تاباق

قۇدا-جەگجاتتىق قاتىناسى بولماسا دا، ەرەكشە سىي قۇرمەتكە يە ادامدارعا ارنايى تارتىلاتىن تاباق.

جاستار تاباعى

ونىڭ ەڭ كادەلى مۇشەلەرى - اسىقتى جىلىك پەن ءتوس. اسىقتى جىلىك ادەتتە كۇيەۋدىڭ جولداسىنا نەمەسە قىزدىڭ جەڭگەسىنە ۇسىنىلادى. كۇيەۋگە البەتتە ءتوس تارتىلادى.

جاي تاباق

ورتان جىلىك، جاۋىرىن، توقپان جىلىك پەن قابىرعا ومىرتقا سالىنادى.