رەسەيلىك وتباسى «سامارا- شىمكەنت» تاسجولىندا بالاسىن جوعالتىپ الدى
بۇل تۋرالى قازاقپارات ق ر ىشكى ىستەر مينيسترلىگىنىڭ Polisia.kz سايتىنا سىلتەمە جاساپ حابارلايدى.
شيەلى اۋداندىق پوليتسيا بولىمىنە ش. قودامانوۆ اۋىلى ماڭىنداعى تراسسادان تابىلعان بالا تۋرالى اقپارات كەلىپ تۇسكەن. ءتۇن ىشىندە جالعىز جۇرگەن 9 جاسار بالانى سامارا-شىمكەنت تاسجولىنىڭ 1957-1907-شاقىرىمىندا سۋناق اتا كەنتى مەن قىزىلوردا وبلىسىنىڭ 19- بولىمشەسى ماڭىندا پاترۋلدىك پوليتسەيلەر بايقاعان.
ولار بالانى شيەلى اۋداندىق پوليتسيا بولىمىنە جەتكىزىپ، قالاي اداسقانىن سۇراستىرعان جانە بىردەن اتا-اناسىن ىزدەستىرۋ جۇمىستارىن باستاعان.
«تەكسەرۋ بارىسىندا 9 جاسار جەتكىنشەك اتا-اناسىمەن بىرگە ساپارلاپ كەلە جاتقانى بەلگىلى بولدى. جول بويىندا كولىك تۇراققا توقتاعان جانە اتا-انا كولىكتەن تۇسكەن. سول ساتتە اۆتوكولىكتىڭ ارتقى ورىندىعىندا ۇيىقتاپ جاتقان بالا ويانىپ، سىرتقا شىققان. اتا-اناسى ونى بايقاماي، كولىكتى وتالدىرىپ، ساپارىن جالعاستىرعان. قىزمەتكەرلەر شۇعىل تۇردە سۇر ءتۇستى Lada-Vesta كولىكتەرىن توقتاتۋعا تاپسىرما بەردى. جەدەل-ىزدەستىرۋ ارەكەتىنىڭ ارقاسىندا كولىك تۇراقتارىنىڭ بىرىنەن بالانىڭ اتا-اناسى تابىلدى. پوليتسەيلەر كەلگەندە عانا اتا-انا بالاسىنىڭ كولىكتەن ءتۇسىپ قالعانىن بايقاعان»، - دەلىنگەن حابارلامادا.
اڭگىمە بارىسىندا ولاردىڭ رەسەي ازاماتتارى ەكەندىگى جانە تاجىكستانعا بارا جاتقانى بەلگىلى بولدى. ولار بالامەن تۋىستىعىن راستايتىن بارلىق قاجەتتى قۇجاتتاردى كورسەتتى. اتا-انا پوليتسياعا جەدەل ارەكەت ەتكەندەرى ءۇشىن جانە ۇلىنىڭ ءومىرىن ساقتاپ قالعانى ءۇشىن العىس ايتتى.
اۆتور: ايجان سەرىكجان قىزى
