قولدى قالتاعا سالماۋ، باعانداردان الىس ءجۇرۋ: قۇتقارۋشىلاردىڭ ەلوردالىقتارعا كەڭەسى
بۇعان دەيىن حابارلاعانىمىزداي، ەرتەڭ، 5-اقپان كۇنى اۋا رايىنىڭ ناشارلاۋىنا بايلانىستى ەلوردادا جانە وزگە 7 وڭىردە ەسكەرتۋ جاريالاندى. نۇر-سۇلتاندا كوكتايعاق بولىپ، جەلدىڭ كۇشى سەكۋندىنا 15-20 مەترگە جەتۋى مۇمكىن.
وسىعان وراي توتەنشە جاعدايلار دەپارتامەنتى ەلوردالىقتار مەن قالا قوناقتارىنا ساقتىق شارالارى تۋرالى ەسكەرتتى.
اتاپ ايتقاندا، قۇتقارۋشىلار اۋا رايىنىڭ وزگەرۋى تۋرالى اقپاراتتى جانە ەنگىزىلگەن شەكتەۋلەردى ءجىتى قاداعالاپ وتىرۋعا، كوشەدە باعانداردان، اعاشتاردان، جارنامالاردان، ەلەكتر جەلىسى جۇيەلەرىنەن جانە سىمداردان الىس جۇرۋگە تىرىسۋعا، ۇيدەگى نەمەسە پاتەردەگى بارلىق تەرەزەلەردى مىقتىلاپ جابۋعا، بالكوننان سىرتقا ۇشىپ، قۇلاۋى مۇمكىن بارلىق زاتتاردى الىپ تاستاۋعا، ۇزىلگەن سىمدار مەن بوس قوزعالىپ تۇرعان زاتتارعا جاقىنداماۋعا، قاتتى جەل بولعان جاعدايدا جاقىن ماڭداعى عيماراتقا كىرىپ، جەل باسىلعانعا دەيىن جاسىرىنۋعا كەڭەس بەرەدى.
مۇنان بولەك، كوكتايعاق كەزىندە قۇلاۋ ىقتيمالدىعىن ازايتۋ ءۇشىن بيىك وكشەلى اياق كيىمنەن باس تارتىپ، تابانى ۇساق ساڭىلاۋلى ماتەريالدان جاسالعان، تايعانامايتىن اياق كيىم كيۋ قاجەت. جولدىڭ ءجۇرۋ بولىگىندە وتە ساق بولىپ، اسىقپاۋ ءارى جۇگىرمەۋ كەرەك. تەگىس ەمەس مۇز قاتقان بارلىق جەرلەردى اينالىپ وتۋگە تىرىسقان ءجون. قول مۇمكىندىگىنشە بوس بولۋى قاجەت. ال ەگدە جاستاعى ادامدارعا رەزەڭكە ۇشتىعى بار تاياق نەمەسە ۇشتارى بار ارنايى تاياق قولدانۋعا كەڭەس بەرىلەدى.
«ەستەرىڭىزدە بولسىن: ارقامەن، بەتپەن قۇلاۋ ءقاۋىپتى، باستان زاقىم الۋىڭىز مۇمكىن. زارداپ شەكسەڭىز مىندەتتى تۇردە دارىگەرگە العاشقى مەديتسينالىق كومەككە جۇگىنىڭىز. توتەنشە جاعداي تۋىنداعان جاعدايدا «112» نومىرىنە قوڭىراۋ شالىڭىز»، - دەپ ەسكەرتەدى دەپارتامەنتتەن.
اۆتور: مارلان جيەمباي
