يزرايلدە قاتەرلى ىسىكتىڭ كەيبىر ءتۇرىن ناۋقاستى اۋرۋحاناعا جاتقىزباي- اق ەمدەيدى
بۇل ەل بۇگىندە قاتەرلى ىسىككە شالدىققان ناۋقاستاردى ەمدەۋ بويىنشا الەمدە الدىڭعى قاتاردا. قاتەرلى ىسىك اۋرۋىنا شالدىققان بۇل ايەل قازىر سىرقاتتى ساۋلەمەن ەمدەۋ ادىسىنە دايىندالىپ جاتىر.
دارىگەرلەردىڭ سوزىنشە، اۋرۋدان ايىعىپ كەتۋگە تولىق مۇمكىندىك بار. ياعني زاماناۋي تەحنولوگيالاردىڭ كومەگىمەن ناۋقاستىڭ دەرتىنە داۋا تابۋعا بولادى. بەس جىل بۇرىن بۇل مۇلدەم مۇمكىن ەمەس- ءتىن.
ناتانەل حوروۆيتتس، ليمفوما ينستيتۋتىنىڭ ديرەكتورى:
- قازىر بىزدە بيولوگيالىق جانە يممۋنولوگيالىق ءدارى- دارمەكتەر پايدا بولدى. ولاردىڭ حيميوتەراپيا سەكىلدى جاناما اسەرى جوق. كەرىسىنشە ناۋقاستارعا ءتيىمدى اسەر ەتەدى. ول ءۇشىن تەك كۇنىنە ءبىر تابلەتكادان ءىشىپ جۇرسە جەتكىلىكتى.
يزرايلدە تەك وتكەن جىلدىڭ وزىندە وبىردان 11 مىڭ ادام كوز جۇمىپتى. سوندىقتان بۇل ەلدە ونكولوگيا سالاسىنا باسا كوڭىل بولىنگەن. ماماندار اتى جامان اۋرۋدى بارىنشا ەرتە انىقتاۋعا تىرىسادى. ويتكەنى قاتەرلى ىسىك نەعۇرلىم ەرتە انىقتالسا، ناۋقاستاردى ەمدەۋ دە سوعۇرلىم جەڭىلىرەك بولماق دەيدى ولار.
نادير اربەر، قاتەرلى ىسىكتى ەرتە دياگنوستيكالاۋ ورتالىعىنىڭ ديرەكتورى:
- بۇگىندە ءبىز قاتەرلى ىسىك اۋرۋىنىڭ پايدا بولۋ ىقتيمالدىلىعىن دا انىقتاي الامىز. ياعني ادامنىڭ بويىنان ىسىككە اينالا قويماعان اتيپيالىق جاسۋشالاردى تابامىز. ەگەر ناۋقاس ءبىزدىڭ كەڭەسىمىزگە قۇلاق اسىپ، سالاۋاتتى ءومىر سالتىن ۇستانسا، اۋرۋعا مۇلدەم شالدىقپاۋى دا مۇمكىن.
جالپى يزرايلدە قاتەرلى ىسىكتىڭ كەيبىر ءتۇرىن ناۋقاستى اۋرۋحاناعا جاتقىزباي- اق ەمدەيدى. ماسەلەن، ەرتە انىقتالعان ءسۇت بەزى وبىرى - سونىڭ ءبىرى. مۇنداي كەزدە ناۋقاس ءدارى تامىزعىشتى قابىلداپ نەمەسە ۇيىندە ءدارى- دارمەك ءىشىپ جۇرەدى.
