ۇستىرتتە فوتوتۇزاققا ىلىنگەن قابىلان قازاقستاننىڭ قىزىل كىتابىنا ەنگىزىلدى
بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگىنڭ ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت Facebook پاراقشاسىندا جازدى.
ونىڭ مالىمەتىنشە، فوتوتۇزاققا قابىلان 2019 -جىلدىڭ جەلتوقسان ايى مەن 2020 -جىلدىڭ قاڭتارىندا ەكى مارتە ءتۇسىپ قالعان. ال جالپى كوميتەت وكىلدەرى ۇستىرتتە قابىلاننىڭ پايدا بولعانىن 2018 -جىلى حابارلاعان بولاتىن.
«سول تۇستا قورىقتا قابىلاندى زەرتتەۋ بويىنشا ەكسپەديتسيا ۇيىمداستىرىلعان ەدى. ەكسپەديتسيا قورىتىندىسى بويىنشا، ماماندار مىسىق تۇقىمداستاردىڭ سيرەك كەزدەسەتىن ءتۇرى - الدىڭعى ازيالىق قابىلاننىڭ پايدا بولعانىن راستاعان ەدى. وسىدان كەيىن كوميتەت جىرتقىشتى زەرتتەي باستادى. جاقىندا سول قابىلاندى «قازاقستان رەسپۋبليكاسىنىڭ قىزىل كىتابىنا ەنگىزۋ» جوباسى بويىنشا مەملەكەتتىك ەكولوگيالىق ساراپتامانىڭ وڭ قورىتىندىسىن الدىق» ، - دەپ جازادى ساكەن دىلداحمەت.
قابىلاندى قىزىل كىتاپقا ەنگىزۋدەگى باستى ماقسات - قازاقستاندا اتالعان اڭدى ساقتاۋ جانە وعان مونيتورينگ جاساۋ بويىنشا جۇمىستى جالعاستىرۋ بولىپ وتىر.
Panthera pardus L. ,1758 قابىلانى - جىرتقىش سۇتقورەكتىلەردىڭ ءتۇرى. نەگىزىنەن افريكا مەن وڭتۇستىك ازيادا مەكەندەيدى.
