الماتىعا كوروناۆيرۋستى انىقتايتىن دياگنوستيكالىق تەست جۇيە جەتكىزىلدى
بۇل تۋرالى الماتى قالاسى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا مالىمدەدى، دەپ حابارلايدى قازاقپارات ءتىلشىسى.
«رەسەيدەن كوروناۆيرۋستى انىقتايتىن تەستىلەر جەتكىزىلدى. ەندى ەلىمىز، ونىڭ ىشىندە الماتى قالاسى دا قاۋىپتى ۆيرۋسقا قارسى تەست جۇمىستارىن جۇرگىزۋگە دايىن. تەست تەكسەرىسى ەكى ساعات ارالىعىندا جاسالادى. كەيىن ول ورتالىق رەفەرەنتتى زەرتحاناعا جىبەرىلەدى جانە سوڭعى قورىتىندى سول جەردە جاسالادى»، - دەپ ءتۇسىندىردى ايزات مولداعاسيموۆا.
ونىڭ ايتۋىنشا، بۇل ۋاقىتقا دەيىن 17 ادامنىڭ قانىن ساراپتاماعا جىبەرىلگەن، ولاردىڭ ءبارى تازا بولىپ شىقتى. كۇدىككە ىلىنگەندەردىڭ بارلىعىنا جرۆي مەن تۇماۋ دياگنوزى قويىلدى. ورتالىق رەفەرەنتتى زەرتحاناعا قازاقستاننىڭ تۇكپىر-تۇكپىرىنەن، سونىڭ ىشىندە الماتى قالاسىنان كەلگەندەردەن 111 ۇلگى الىندى. ونىڭ 100 ءى تەرىس ناتيجەلى، ال 11 سىناما ءالى تەكسەرىلىپ جاتىر.
الماتىداعى ەمحانالاردىڭ بارلىعىندا ناۋقاستاردى وقشاۋلاۋ ورنى اشىلدى. بۇعان دەيىن مۇنداي ورىندار اۋرۋحانالاردا جاساقتالعان بولاتىن.
«ەگەر كوروناۆيرۋس تاراپ جاتقان جەردەن كەلگەن بولساڭىز پوليكلينيكاعا نەمەسە قان تاپسىرۋ زەرتحانالارىنا بارۋدىڭ قاجەتى جوق. بىردەن 1406 Call-ورتالىعىنا حابارلاسىڭىزدار، سول جەردە ءتيىستى جاۋاپ الا الاسىزدار نەمەسە جەدەل جاردەم شاقىرىڭىزدار»، - دەدى ول.
ەسكە سالايىق، الماتىدا الماتى قالاسى اكىمىنىڭ ورىنباسارى ەرجان باباقۇماروۆتىڭ توراعالىعىمەن كوروناۆيرۋستىق ينفەكتسيانىڭ تارالۋىنىڭ الدىن الۋ جونىندەگى وڭىرلىك شتاب قۇرىلعان. وڭىرلىك شتاب مەگاپوليس اۋەجايىندا كوروناۆيرۋسقا قارسى ءىس-قيمىل شارالاردىڭ ورىندالۋىن تەكسەردى.
