ماسكەۋدەگى ءابىليازوۆ سوتى: «ب ت ا بانكىنەن» قارجىنى جىمقىرۋ سحەماسى ايتىلدى

ماسكەۋ. قازاقپارات - ماسكەۋ قالاسىنىڭ تاگان اۋداندىق سوتى قازاقستاندىق بۇرىنعى بانكير مۇحتار ابىليازوۆكە قاتىستى قىلمىستىق ءىستى قارادى، دەپ حابارلايدى «قازاقپارات» ح ا ا مەنشىكتى ءتىلشىسى.

قىلمىستىق ءىس بويىنشا سونداي-اق سىبايلاس رەتىندەگى ر ف- دان كەتىپ قالعان ءتورت ازامات - ي. ۆ. كونونكو، ت. ن. پاراسكيەۆيچ، ا. ۆ. ەرەشەنكو جانە ا. ا. ۋدوۆەنكونىڭ ءىسى قارالۋدا.

مەملەكەتتىك ايىپتاۋشى ايىپتاۋ قورىتىندىسىن 1 ساعات 40 مينۋت وقىدى. ايىپتاۋ تاراپىنىڭ مالىمەتىنشە، م. ءابىلازوۆ قۇرعان ۇيىمداسقان قىلمىستىق توپ «ب ت ا بانكى» ا ق- تىڭ اقشاسىن ۇرلاۋ ىسىمەن اينالىسقان. بىرنەشە ەپيزود بويىنشا نەگىزگى سحەما - قازاقستاندىق بانكتىڭ شوتى ەسەبىنەن جالعان زاڭدى تۇلعالاردى نەسيەلەۋ بولىپ وتىر. ولاردىڭ ىشىندە ءىرى جەر ۋچاسكەلەرى مەن جىلجىمايتىن مۇلىكتىڭ ءارتۇرلى نىساندارىن الۋعا، كولىك-لوگيستيكالىق ورتالىقتاردىڭ، ساۋدا- ويىن-ساۋىق جانە قوناق ءۇي كەشەندەرىنىڭ قۇرىلىسىن جۇرگىزۋگە قاتىستى فاكتتەر بار.

«وسىلايشا، مۇحتار ءابىليازوۆقا ر ف قىلمىستىق كودەكسىنىڭ 159-بابى 4-بولىگى (الاياقتىق)، 174-بابى 3-بولىگى (باسقا ادامنىڭ اتىنان قىلمىستىق جولمەن اقشانى جىمقىرۋ)، 201-بابى 2-بولىگى (قىزمەتىن تەرىس پايدالانۋ)، 165-بابى 2-بولىگى ا، ب تارماقتارى بويىنشا (الداۋ نەمەسە سەنىمگە كىرۋ ارقىلى مۇلىكتىك زيان كەلتىرۋ) 9 قىلمىسقا قاتىستى ايىپ تاعىلىپ وتىر»، - دەدى مەملەكەتتىك ايىپتاۋشى.

تىڭداۋدان كەيىن سوت كەلەسى وتىرىستى وسى جىلدىڭ 10- اقپانىنا اۋىستىرۋ تۋرالى قاۋلى شىعاردى. بۇل ۋاقىت تاراپتاردىڭ ءوز دالەلىن، كۋاگەرلىك تۇسىنىكتەرىن جانە ىسكە قاتىستى وزگە دە ماتەريالداردى اكەلۋى ءۇشىن بەرىلىپ وتىر.

ەسكە سالا كەتسەك، مۇحتار ءابىلازوۆ پەن تاعى ءتورت ازامات - ي. ۆ. كونونكو، ت. ن. پاراسكيەۆيچ، ا. ۆ. ەرەشەنكو جانە ا. ا. ۋدوۆەنكوعا قاتىستى ءىس تاگان اۋداندىق سوتىنا 2019-جىلدىڭ جەلتوقسانىندا كەلىپ تۇسكەن بولاتىن.

مۇحتار ءابىلازوۆتىڭ قورعاۋىن مەملەكەت اتىنان ادۆوكات جۇرگىزىپ جاتىر. سونىمەن بىرگە، پروتسەسكە ماسكەۋ قالاسىنىڭ ادۆوكاتتىق كەڭسەسىنىڭ وكىلدەرى قاتىسۋدا.

ب ت ا بانكى - زارداپ شەككەندەردىڭ مۇددەسىن دە رەسەيلىك ادۆوكاتتار قورعاۋدا.

ايتا كەتسەك، 2018-جىلدىڭ ناۋرىزىندا ق ر باس پروكۋراتۋراسىنىڭ وكىلدەرى و ك ق- دا مۇحتار ءابىلازوۆقا قاتىستى مالىمدەمە جاساپ، «قازاقستاننىڭ دەموكراتيالىق تاڭداۋى» ەكسترەميستىك ۇيىم دەپ تانىلعانىن جاريالاعان ەدى.

«باس پروكۋراتۋرا سوت شەشىمىمەن كەيىن «قازاقستاننىڭ دەموكراتيالىق تاڭداۋى» ەكسترەميستىك ۇيىمىنىڭ ارەكەتىنە قاتىسقانى جانە قارجىلاندىرعانى ءۇشىن قىلمىستىق كودەكستىڭ 182، 258 جانە 405 باپتارىنا سايكەس قىلمىستىق جاۋاپكەرشىلىك كوزدەلگەن. قاتىسۋ ارەكەتىنە، قوزعالىستىڭ يدەياسىن ناسيحاتتاۋ، ونىڭ جاريالانىمدارىن، پاراقشالارىن، پوستتارىن جانە پىكىرلەرىن، باسقا دا اقپاراتتىق ماتەريالدارىن دايىنداۋ، شىعارۋ، كوبەيتۋ جانە تاراتۋ جاتادى. سونىمەن قاتار، قاتىسۋ بولىپ قوزعالىستى جانە ونىڭ باسشىسى ءابىلازوۆتى قولداۋعا ميتينگتەردى، شەرۋلەردى، جاريا اكسيالارىن جانە باسقا جاپپاي ءىس-شارالاردى ۇيىمداستىرۋ، وتكىزۋ سانالادى. قارجىلاندىرۋ ۇعىمىنا ابىلازوۆپەن قوزعالىسقا اقشانى، وزگە مۇلىكتى بەرۋ نەمەسە جيناۋ، سىيعا تارتۋ، ايىرباستاۋ، قايىرىمدىق جاساۋ، سپونسورلىق جانە قايىرىمدىلىق كومەك، اقپاراتتىق جانە وزگە دە قىزمەتتەردى كورسەتۋ جاتادى. سونىمەن قاتار، ىستەگى زاڭناماعا سايكەس، ەكسترەميستىك توپتىڭ ارەكەتىنە قاتىسۋدى ءوز ەركىمەن توقتاتقان ادام قىلمىستىق جاۋاپتىلىقتان بوساتىلادى»، - دەلىنگەن مالىمدەمەدە.