تۇركىستان «اقىلدى قالاعا» اينالادى
بۇل ماسەلە تۇركىستان وبلىسىنىڭ اكىمدىگىندە ءومىرزاق شوكەيەۆتىڭ توراعالىعىمەن وتكەن اپپارات جيىنىندا تالقىلاندى، دەپ حابارلايدى قازاقپارات ءتىلشىسى.
جيىندا قۇرىلىس قارقىن العان كيەلى شاھارداعى عيماراتتار مەن ساياباقتار، كوپىرلەر مەن اللەيالار ءبىر ۇلگىدە جارىقتاندىرىلاتىنى جانە جاڭا كەيىپكە ەنەتىنى ايتىلدى. اتالعان جوبا الداعى بىرنەشە ايدىڭ ىشىندە جۇزەگە اسىپ، قالاعا قايتالانباس رەڭك بەرەدى.
مامانداردىڭ سوزىنشە، قالانىڭ سيمۆولىنا اينالعان قوجا احمەت ياساۋي كەسەنەسى دە جارىقتاندىرىلادى. تۋريستەر ءۇشىن ەرەكشە تارتىمدى نىسانداردىڭ بۇكىلالەمدىك تىزىمىنە كىرگەن قاسيەتتى مەكەننىڭ قابىرعالارى الىستان جارقىراپ كوزگە تۇسەتىن بولادى. جينالىستا وبلىستىق ماڭىزى بار جولدارعا قاتىستى ماسەلەلەر دە كوتەرىلدى. وڭىردە جالپى قاشىقتىعى 4 مىڭ شاقىرىم جول بولسا، بىلتىر ونىڭ 1270 شاقىرىمى جوندەلگەن.
اعىمداعى جىلى 869,8 شاقىرىم جول جوندەۋدەن وتەدى دەپ كۇتىلۋدە. 2021-جىلى وبلىستىق جانە اۋداندىق ماڭىزى بار اۆتوموبيل جولدارىنىڭ جاقسى جانە قاناعاتتى جاعدايداعى ۇلەسىن 81,4 پايىزعا دەيىن ۇلعايتۋ كوزدەلگەن. اپپارات جيىنىندا وبلىس باسشىسى ءومىرزاق شوكەيەۆ كۇردەلى جوندەۋگە كەتەتىن ۋاقىت پەن قاراجاتتى ۇنەمدەۋدى، ءوڭىر كليماتىنا ءتوزىمدى سانالاتىن قۇرىلىس ماتەريالدارىن قولدانۋدى تاپسىردى.
ماجىلىستە سونداي-اق، «Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەن تاجىبايەۆ «قامقورلىق» كەشەندى باعدارلاماسى جۇرتشىلىق تاراپىنان جوعارى باعالانعانىن اتاپ ءوتتى. تۇرمىس تاۋقىمەتىن تارتىپ، قيىن جاعدايدا قالعان وتباسىلاردى قولداۋ باعىتىنداعى باعدارلاما اياسىندا بارلىق اۋدان- قالالاردا جەرگىلىكتى اتقارۋشى ورگان وكىلدەرى، اۋداندىق ءماسليحات دەپۋتاتتارى، باستاۋىش پارتيا ۇيىمدارى ءتوراعالارى جانە جەكە كاسىپكەرلەردىڭ قاتىسۋىمەن قايىرىمدىلىق شارالارى ءوتىپ جاتقانىن جەتكىزدى.
ونىڭ سوزىنشە، 10 كۇندە الەۋمەتتىك سالاعا جاۋاپتى باسقارما جانە اۋدان، قالا اكىمدىكتەرى جانە پارتيا فيليالى ارقىلى 700-دەي وتباسىعا كومەك كورسەتىلگەن. مۇقتاج جاندار قاجەتتى ازىق- تۇلىك جانە كيىم-كەشەكپەن، كومىرمەن قامتاماسىز ەتىلگەن. ءبىر ازاماتقا مۇگەدەك ارباسى بەرىلىپ، وتىرار اۋدانىندا 2 تۇرمىسى تومەن وتباسىعا دەمەۋشىلەر ەسەبىنەن تۇرعىن ۇيلەر ساتىپ الىنعان. وسى اۋداندا كومەككە ءزارۋ وتباسىلارعا 2 باس ۇساق مال تاراتىلىپ، سايرام اۋدانىندا تۇراتىن كوپبالالى جانۇيالارعا كاسىپكەرلەر كومەگىمەن تۇرعىن ءۇي سالىنىپ بەرىلگەن.
