دارىگەرلەر ۋحاننان جەتكىزىلگەننەن ستۋدەنتتەردىڭ جاعدايى تۋرالى ايتتى

نۇر- سۇلتان. قازاقپارات – ق ر دەنساۋلىق ساقتاۋ مينيسترلىگى تاۋارلار مەن قىزمەتتەر قاۋىپسىزدىگىنىڭ ساپاسىن باقىلاۋ كوميتەتى ءتوراعاسىنىڭ ورىنباسارى نۇرقان ءسادۋاقاسوۆ ۋحاننان جەتكىزىلگەننەن كەيىن كارانتينگە جاتقىزىلعان ستۋدەنتتەردىڭ جاعدايىن ايتىپ بەردى، دەپ حابارلايدى قازاقپارات.

«ۋحاننان چارتەرلىك رەيسپەن جەتكىزىلگەننەن كەيىن كارانتينگە 89 ادام جاتقىزىلدى. 89 قازاقستاندىق، ونىڭ ىشىندە 80 ستۋدەنت بار. ولاردىڭ بارلىعى نۇر- سۇلتان قالاسىنداعى كوپبەيىندى اۋرۋحانا ورنالاستىرىلدى. اۋرۋحانا جاڭا، جوعارى قاۋىپسىزدىك جۇيەسىمەن جابدىقتالعان. ءاربىر قاباتتاعى ءاربىر پالاتانىڭ دەربەس جەلدەتۋ جۇيەسى بار. بۇل وتە جاقسى جۇيە، «تازا ءۇي- جاي» دەپ اتالادى. ول اۋانىڭ ارالاسۋىنا جول بەرمەيدى. اۋا پالاتادان دالىزگە جانە كەرى باعىتتا شىقپايدى»، - دەدى نۇرقان ءسادۋاقاسوۆ.

ونىڭ اتاپ وتۋىنشە، ۇشاق بورتىندا دارىگەرلەر تاعى ءبىر مارتە تەرمومەتريا جۇرگىزىپ، ادامداردىڭ قىزۋىن ولشەگەن.

«ۇشاق بورتىنا كوتەرىلگەن كەزدە تاعى ءبىر تەرمومەترياعا جۇرگىزگەن ەدىك. ياعني، ۇشاقتا ولارمەن بىرگە سانيتارلىق اۆياتسيانىڭ دارىگەرلەرى مەن دارىگەر- ەپيدەميولوگ بولدى. ءبىر ايەلدە 37,2 دەنە قىزۋى بولدى. ءبىراق، وندا قانداي دا ءبىر سىرتتاي بەلگىلەرى (كوروناۆيۋرس بەلگىلەرى) انىقتالعان جوق. ولار 2,3 جانە 4 ورىندىق پالاتالارعا ورنالاستىرىلدى، جاعدايلارى جانە تاماقتارى وتە جاقسى. جۇكتەرى وڭدەلگەننەن كەيىن ساقتاۋ قويماسىنا تاپسىرىلدى»، - دەدى ول.

ونىڭ سوزىنە قاراعاندا، كوپبەيىندى اۋرۋحانانىڭ ينفەكتسيالىق بلوگى ءبىر- بىرىنەن وقشاۋلانعان.

«قازاقستاننىڭ بارلىق قالالارىنىڭ، نەگىزىنەن نۇر- سۇلتان، الماتى، شىمكەنت، اقتاۋ، سەمەي، الماتى، قاراعاندى وبلىستارىنان بارعان ستۋدەنتتەر. ولار ءبىزدىڭ تالاپتارىمىزبەن كەلىسىپ وتىر. سەبەبى ول جاقتا دا ءدال وسىنداي تالاپ بولعان. ولار ينفەكتسيالىق بلوكتىڭ وقاشاۋلاندىرىلعان پالاتالارىندا جاتىر، دالىزگە شىقپايدى. حالقىمىزدى قورعاۋ ءۇشىن بارىنشا قاۋىپسىزدىك شارالارىن قابىلداۋعا مىندەتتىمىز»، - دەدى نۇرقان ءسادۋاقاسوۆ.

ءوز كەزەگىندە نۇر- سۇلتان قالالىق كوپبەيىندى مەديتسينالىق ورتالىعى ينفەكتسيالىق بلوگى ديرەكتورىنىڭ ورىنباسارى ساۋلە اتىعايەۆا كاراتيندە جاتقان ادامداردىڭ جاعدايى قانداي ەكەندىگىن ايتىپ بەردى.

«ولاردىڭ بارلىعى دا ءتۇرلى ۋاقىتتا كەلدى. ءبىز 28 - قاڭتاردا اشىلدىق. نەگىزگى بولىگى كەشە كەلدى. ستۋدەنتتەر مەن جەكە كاسىپكەرلەر كوپ. پاتسيەنتتەردىڭ جاعدايى بۇگىن تاڭەرتەڭ قاناعاتتانارلىق بولدى. ولاردىڭ تاراپىنان ايتارلىقتاي شاعىم جوق. ينتوكسيكاتسيا بەلگىلەرى بايقالمايدى، تىنىس الۋلارىندا كەمشىلىك جوق، دەنە قىزۋلارى شەكتى نورمادا. مەديتسينالىق قاداعالاۋ ينكۋباتسيالىق كەزەڭ بويىنا جالعاسادى. بۇل جەردە جاتقان پاتسيەنتتەردىڭ باسىم بولىگى كوروناۆيرۋس ينفەكسياسىنىڭ تارالۋ جوعارى ايماقتا بولعان»، - دەدى دارىگەر.

اۋرۋحانادا جاتقان پاتسيەنتتەردىڭ ءبىرى جۋرناليستەرمەن اڭگىمەلەسۋگە كەلىسىم بەردى. ونىڭ ايتۋىنشا، پاتسيەنتتەردىڭ تەلەفوندارى دا وزگە زاتتارمەن بىرگە وڭدەۋ ءۇشىن الىنعان. دەگەنمەن، اۋرۋحانانىڭ ستاتسيونارلىق تەلەفونى ارقىلى بايلانىسۋعا مۇمكىندىك بار.

«2016 -جىلدان بەرى ۋحان قالاسىندا بولدىم. 22 - قاڭتاردا قالادا كارانتين جاريالانعان كەزدە 100-دەن استام ادام بولعان ەدىك. مەن جانە تاعى ەكى ستۋدەنت ەۆاكۋاتسيالاۋ بويىنشا وپەراتسيانى ۇيلەستىرۋگە كومەك بەردىك. ەۆاكۋاتسيالاۋ جوسپارىن ءبىر اپتا بويى دايىندادىق. سەبەبى ناقتى شەشىم بولعان جوق. سوڭعى ۋاقىتقا دەيىن قىتاي وزگە ەلدەرگە اۋە كەڭىستىگىن پايدالانۋعا رۇقسات بەرمەدى»، - دەدى ۋحاننان كەلگەن قازاقستاندىق ستۋدەنت.

ول اۋرۋحانادا جاتقان ادامداردىڭ تۋعان- تۋىستارىنا الاڭداماۋدى ءوتىنىپ، بارلىعىنىڭ جاعدايى جاقسى ەكەندىگىن ايتتى.

«ۇزاق ۋاقىت قىتايدا بولعان بالالار ءوز نومىرلەرىن تىركەپ ۇلگەرمەدى جانە قازاقستانعا كەلگەننەن كەيىن ولاردىڭ ءنومىرى ءوشىپ تۇر. ولاردىڭ اتا- انالارى ەۆاكۋاتسيالاۋ جوسپارىنا ساي قازاقستانعا كەلگەنىمىزدى بىلەدى. ءبىراق، كىم قاي پالاتادا ەكەنىن بىلمەيمىز»، - دەدى ستۋدەنت قىز.

ءسوز سوڭىندا ول قولداۋ كورسەتكەن وتانداستارىنا ريزاشىلىعىن ءبىلدىردى.

«قۇرمەتتى قازاقستان حالقى! ءبىز بارلىعىمىز وتانىمىزعا ورالدىق جانە دارىگەرلەردىڭ تۇراقتى باقىلاۋىندامىز. بىزدە ءبارى جاقسى. شىن نيەتىمىن ءبىز ءۇشىن الاڭداۋشىلىق تانىتقان بارلىعىڭىزعا ۇلكەن راحمەت»، - دەدى ول.

ەسكە سالساق، 2 - اقپانىندا قازاقستان رەسپۋبليكاسى ازاماتتارىنىڭ دەنساۋلىق قاۋىپسىزدىگىن قامتاماسىز ەتۋ ماقساتىندا ق ر د س م ۇلتتىق شۇعىل مەديتسينا ۇيلەستىرۋ ورتالىعى ەلىمىزگە ق ح ر ۋحان قالاسىندا جۇرگەن 83 قازاقستاندىقتى، ونىڭ ىشىندە 80 ستۋدەنتتى ەلگە جەتكىزگەن ەدى.

اۆتور: مارلان جيەمباي