قازاقستان مەن قىتاي اراسىندا اۋە رەيستەرى توقتايدى

نۇر- سۇلتان. قازاقپارات - كوروناۆيرۋس ىندەتىنە بايلانىستى قازاقستان مەن قىتاي اراسىنداعى اۋە قاتىناسى توقتايدى. بۇل تۋرالى ق ر باس سانيتارلىق دارىگەرى جانداربەك بەكشين ايتىپ بەردى، دەپ حابارلايدى قازاقپارات.

«3 - اقپاننان باستاپ، قىتايمەن شەكارا ءىس جۇزىندە جابىلدى. بۇگىن سوڭعى ۇشاقتار ءبىزدىڭ ازاماتتارىمىزدى ەلگە اكەلەدى. ەرتەڭنەن باستاپ، تىكەلەي اۋە قىزمەتى توقتايدى. ال اۆتوبۋس جانە پويىز قوزعالىسىنىڭ توقتاعانىنا ءبىراز ۋاقىت بولدى» ، - دەدى ج. بەكشين بۇگىن قازمەديا ورتالىعىندا وتكەن بريفينگتە.

ونىڭ ايتۋىنشا، قازىرگى ۋاقىتتا شەكارادان تەك رەسمي دەلەگاتسيالار، شەنەۋنىكتەر مەن جۇك تاسىمالى عانا وتكىزىلەدى.

«ولار ەكى ەل ۇكىمەتىنىڭ دە جىلۋ سەزگىش قۇرىلعىسىمەن (تەپلوۆيزور) سكانەرلەنەدى. رەسپۋبليكالىق شتاب شەشىمىنە سايكەس، قازىرگى ۋاقىتتا قازاقستاننىڭ بارلىق شەكارالىق بەكەتتەرىندە تەپلوۆيزورلارمەن ۇزدىكسىز باقىلاۋ ورناتىپ جاتىرمىز. بۇل اۋرۋ تۋرالى حالىققا 6 -قاڭتاردا مالىمدەمە جاساعانبىز. سول كۇننەن باستاپ، قىتايدان كەلگەن بارلىق جولاۋشىلارعا قوسىمشا باقىلاۋ جۇرگىزۋدى باستادىق. ال 2017 -جىلدان بەرى بارلىق حالىقارالىق رەيستەردەن كەلگەن جولاۋشىلاردى جىلۋ سەزگىش ستاتسيونارلىق قۇرىلعىمەن باقىلاۋدى تۇراقتى تۇردە جۇرگىزىپ كەلەمىز» ، - دەدى باس سانيتارلىق دارىگەر.

سونىمەن بىرگە، ق ر ۇكىمەتى جانىنداعى ەل اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا باسشىسى بەردىبەك ساپاربايەۆتىڭ تاپسىرماسىمەن، وتكەن اپتادا قازاقستان- قىتاي شەكاراسىندا 8 كەدەندىك بەكەتتىڭ سانيتارلىق باقىلاۋ جۇيەسى قوسىمشا تەكسەرىلدى.

«مەديتسينالىق بەتپەردە وندىرۋشىلەر تولىق قۋاتپەن جۇمىس ىستەپ جاتىر. ۇكىمەت كوروناۆيرۋسقا قاتىستى ءتۇرلى ساتىپ الۋلار ءۇشىن 1,5 ميلليارد تەڭگە قاراجات ءبولدى. قاجەت بولعان جاعدايدا كەز كەلگەن كولەمدە ماسكا ساتىپ الا الامىز» ، - دەدى جانداربەك بەكشين.

بۇعان دەيىن باس سانيتارلىق دارىگەر ۋحان قالاسىنان ەۆاكۋاتسيالانعان ازاماتتاردىڭ جاعدايى تۋرالى ايتىپ بەرگەن ەدى.