كوروناۆيرۋس الەمدىك رەتسەسسيانى ىسكە قوساتىن ماڭىزدى تريگگەر ەمەس - ەربولات دوسايەۆ

الماتى. قازاقپارات – ق ر ۇلتتىق بانك ءتوراعاسى ەربولات دوسايەۆ قىتايداعى كوروناۆيرۋستىق ىندەت الەمدىك ەكونوميكاعا قالاي اسەر ەتۋى مۇمكىندىگىنە قاتىستى پىكىرىمەن ءبولىستى، دەپ حابارلايدى قازاقپارات ءتىلشىسى.

«داعدارىسقا قارسى ءتۇرلى جوسپارلار جاسالدى. بىزدە الدىڭعى جىلدارعا جوسپار قۇرۋ بويىنشا تاجىربيەمىز مول. وتكەن جىلدىڭ سوڭىندا ۇكىمەتپەن بىرگە قازىرگى جاعدايدى ەسكەرە وتىرىپ، باعدارلامالاردى جاڭارتتىق. اتاپ ايتار بولساق، مۇناي باعاسىنىڭ تومەندەۋى، ساۋدا كەدەرگىلەرىن ەسكەرۋ سەناريى بويىنشا ۇكىمەت پەن ۇلتتىق بانكتە جوسپار بار» ، - دەدى بۇگىن الماتىدا وتكەن بريفينگتە ەربولات دوسايەۆ.

ونىڭ ايتۋىنشا، بۇگىندە الەم ەكىگە ءبولىندى: ءبىرى - تۇبەگەيلى، كوروناۆيرۋستىق ىندەت جاھاندىق ەكونوميكالىق قۇلدىراۋدىڭ قوزدىرعىشى بولادى دەپ ساناسا، ەكىنشى تاراپ قىتاي ۇكىمەتى قىسقا مەرزىمدە جۇقپالى اۋرۋدى جەڭەدى دەگەن ويدا.

«بۇكىل الەمدى لوكاليزاتسيا قىزىقتىرادى. بۇل ماسەلە تەك قىتايلىق پروبلەما ەمەس جانە ونى ءبارى جاقسى تۇسىنەدى. سوندىقتان، مەنىڭ ويىمشا، الەمدىك قاۋىمداستىق قىتاي ەكونوميكاسىنىڭ دامۋ تۇراقتىلىعىنا مۇددەلى. بۇگىنگى تاڭدا بىزگە قاجەتتى شەشىمدەر قابىلداۋ ءۇشىن ۇلتتىق ەكونوميكالىق مۇددەلەردى قورعاۋ اياسىندا وقيعالار مەن ماسەلەلەرگە مۇقيات باقىلاۋ جۇرگىزۋ قاجەت. مەنىڭشە، كوروناۆيرۋس الەمدىك رەتسەسسيانى ىسكە قوساتىن ماڭىزدى تريگگەر ەمەس. قازىرگى جوسپارلارمەن سالىستىرعاندا Slowdown بولۋى مۇمكىن، ءبىراق ءبىر اي عانا ءوتتى» ، - دەدى ۇلتتىق بانك باسشىسى.