مينيستر كوپبالالى وتباسىلارعا الەۋمەتتىك توپتاما قاشان بەرىلەتىنىن ايتتى

نۇر- سۇلتان. قازاقپارات - كوپبالالى وتباسىلارعا كەپىلدەندىرىلگەن الەۋمەتتىك توپتاما قاشان بەرىلەتىنى بەلگىلى بولدى.

بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.

«2020 -جىلدان اتاۋلى الەۋمەتتىك كومەكتىڭ جاڭا ءتارتىبى قولدانىسقا ەنگىزىلدى. بۇگىنگى كۇنى قازاقستان بويىنشا 97,5 مىڭ وتباسى نەمەسە 504 مىڭ ادام جەرگىلىكتى اتقارۋشى ورگاندارعا ءوتىنىش بەردى. ونىڭ 64 پايىزى بالالار، 41 پايىزى كوپبالالى وتباسىلار. قازىرگى ۋاقىتتا 2260 تان استام ۋچاسكەلىك كوميسسيا جۇمىس ىستەپ جاتىر. 47 مىڭ وتباسىعا نەمەسە 237 مىڭ ادامعا اتاۋلى الەۋمەتتىك كومەك تاعايىندالدى. بالالارعا ارنالعان كەپىلدەندىرىلگەن الەۋمەتتىك توپتاما دا بەرىلەدى. ول جاڭا ءتارتىپ. بۇعان قاتىستى جۇمىستىڭ ءبارىن اتقاردىق. جەرگىلىكتى اتقارۋشى ورگاندارمەن بۇكىل تەتىگىن پىسىقتادىق. بۇل جەردە مەملەكەتتىك ساتىپ الۋ ءتارتىبى جۇرەدى. وعان ەل پرەزيدەنتى ءوزىنىڭ ءتيىستى تاپسىرماسى مەن رۇقساتىن بەردى. ءدال وسى از قامتىلعان وتباسىلارعا كەپىلدەندىرىلگەن الەۋمەتتىك توپتامانى ءبىر كوزدەن ساتىپ الۋ جونىندە ۇكىمەت ءوز تاراپىنان اكىمدىكتەردىڭ ۇسىنىسى بويىنشا 543 جەتكىزۋشىنى بەلگىلەدى» ، - دەدى ول.

وسى رەتتە مينيستر بۇل كومەك ءتۇرى قاي ۋاقىتتان باستاپ بەرىلەتىندىگىن ناقتى ايتتى.

«ءبىزدىڭ جوسپارىمىز بويىنشا اقپان ايىنىڭ 5 ىنە دەيىن كەلىسىمشارت جاسالىپ بىتەدى. اتاۋلى الەۋمەتتىك كومەككە قاڭتاردا ءوتىنىش بەرگەن ازاماتتاردىڭ ءتىزىمى بەلگىلەندى. اتاۋلى الەۋمەتتىك كومەككە يە بولعان ازاماتتار كەپىلدەندىرىلگەن الەۋمەتتىك توپتاماعا دا يە بولادى. 10 - اقپاننان قاڭتار ايىنىڭ اتاۋلى الەۋمەتتىك كومەگى تولەنە باستايدى. 15 - اقپانعا قاراي الەۋمەتتىك توپتاما دا حالىققا جەتكىزىلەدى» ، - دەدى ءبىرجان نۇرىمبەتوۆ.