قازاق قىزى يراندىقتارعا اباي شىعارمالارىن ناسيحاتتاپ ءجۇر
ءتارجىماشى قىز اقىننىڭ كىتاپتارىن جيناپ قانا قويماي، ولاردى ورىس، اعىلشىن جانە پارسى تىلدەرىنە اۋدارۋمەن اينالىسادى. ونىڭ كىتاپحاناسىندا ۇلى ويشىلدىڭ ونداعان تۋىندىسى بار. ول اي سايىن كىتاپ كورمەلەرى مەن جارمەڭكەلەر ۇيىمداستىرىپ، تاياۋ شىعىس حالقىنا ەلىمىزدىڭ ادەبيەتى مەن مادەنيەتىن تانىتىپ ءجۇر.
حاكىم ابايدى يراندىقتار دا الدەقاشان مويىنداعان. گاۋحار ومارحانوۆانىڭ ايتۋىنشا، اۋدارمادا ەڭ قيىنى - كلاسسيكتىڭ شىعارمالارىنىڭ ماعىناسى عانا ەمەس، ادەبي ورامدارىن دا وزگەرىسسىز جەتكىزۋ.
يراندىق جاستار اباي قۇنانبايەۆتىڭ شىعارمالارىن گاۋحار سياقتى قانداستارىمىزدىڭ ارقاسىندا تانىپ، ءبىلىپ كەلەدى.
«ەلىمىزدى ۇلى اقىن اباي قۇنانبايەۆتىڭ شىعارمالارى ارقىلى تانىستىرىپ جاتقانىمىزدى ماقتان تۇتامىز. ماعان ونىڭ ولەڭدەرى مەن قارا سوزدەرى قاتتى ۇنايدى. سوندىقتان يراندا ءار تىلدە جارىق كورگەن اقىننىڭ بارلىق شىعارمالارىن جيناپ كەلەمىن»، - دەيدى گاۋحار.
گاۋحاردىڭ تالپىنىسىنىڭ ارقاسىندا تەگەرانداعى كىتاپ جارمەڭكەلەرىنىڭ كوبى اباي شىعارمالارىنسىز وتپەيدى. جەرگىلىكتى مەدياحولدينگتىڭ بىرىندە جۇمىس ىستەيتىن جاس قىز يراندىقتاردى ەلىمىزدىڭ مادەنيەتىمەن تەلەارنا مەن راديو ارقىلى دا تانىستىرىپ تۇرادى.
«كىتاپحانامدا پارسى تىلىنە اۋدارىلعان اباي جولى مەن قازاق تىلىندەگى نۇسقاسى بار. بۇدان بولەك، اقىننىڭ پارسى ءتىلى مەن اعىلشىن تىلىنە اۋدارىلعان ولەڭدەرى بار»، - دەيدى وتانداسىمىز.
10 جىل ىشىندە گاۋحار قانشاما يراندىقتىڭ اباي تۋىندىلارىنا دەگەن ماحابباتىن وياتقانىن ساناپ جەتكىزۋ مۇمكىن ەمەس. ولاردىڭ قاتارى جۇزدەپ سانالاتىن شىعار.
«سەبەبى، ۇلى اقىننىڭ ولەڭدەرى ءار ادامنىڭ جۇرەگىنە تەز جول تاۋىپ، باۋراپ الادى»، - دەيدى اۋدارماشى قىز.
