تەننيس: نوۆاك دجوكوۆيچ سەگىزىنشى مارتە اۋستراليا چەمپيونى اتاندى

نۇر-سۇلتان. قازاقپارات - سەربيالىق نوۆاك دجوكوۆيچ سەگىزىنشى مارتە اۋستراليا اشىق چەمپيوناتىنىڭ جەڭىمپازى اتاندى، دەپ حابارلايدى قازاقپارات ءتىلشىسى.

فينالدا الەمنىڭ 2-راكەتكاسى نوۆاك دجوكوۆيچ پەن رەيتينگتە 5-ورىندا تۇرعان اۋستريالىق دومينيك تيم باس جۇلدەنى ساراپقا سالدى.

بۇعان دەيىن قارسىلاستاردىڭ ون رەت جولدارى توقايلاسسا، سونىڭ التاۋىندا 32 جاستاعى سەربيالىق تەننيسشىنىڭ مەرەيى ۇستەم بولدى.

ن. دجوكوۆيچ 16 مارتە «ۇلكەن دۋلىعا» تۋرنيرىنىڭ جەڭىمپازى اتانسا، سونىڭ جەتەۋى اۋستراليا اشىق چەمپيوناتى ەكەن. ونىڭ ۇستىنە نوۆاك اۋستراليا بىرىنشىلىگىندە فينالدىق ماتچتا جەڭىلىپ كورمەگەن.

ال 26 جاستاعى د. تيم بۇعان دەيىن 2018- جانە 2019-جىلدارى فرانسيا اشىق چەمپيوناتىنىڭ فينالىنا شىققانىمەن، ەكەۋىندە دە ۇتىلىپ قالعان بولاتىن.

ءبىرىنشى پارتيادا سەربيالىق سپورتشى 3:0, 4:1 ەسەبىمەن العا شىقتى. قارسىلاسى تارازى باسىن تەڭەستىرگەنىمەن، ن. دجوكوۆيچ بۇل سەتتى بەرمەدى - 6:4.

ەسەسىنە ەكىنشى جانە ءۇشىنشى سەتتە د. تيم كۇش الىپ كەتتى - 6:4, 6:2.

دەگەنمەن ءتورتىنشى پارتيادا ن. دجوكوۆيچ برەيك جاساپ، سول باسىمدىلىعىن پايدالانا ءبىلدى - 6:3.

بەسىنشى، شەشۋشى پارتيادا ەسەپ 1:1 بولعان مەزەتتە سەربيالىق تەننيسشى برەيك جاساي الدى - 2:1. بۇدان كەيىن د. تيم قارىمتا قايتاراتىنداي مۇمكىندىگىن ءمۇلت جىبەردى. اقىرى ەسەپ 5:4 بولىپ، ن. دجوكوۆيچ ماتچقا دوپ بەرگەندە، قاتەلەسكەن جوق - 6:4.

ناعىز فينالعا ءتان، تارتىستى وتكەن باسەكە ءتورت ساعاتقا سوزىلدى.

وسىلايشا ن. دجوكوۆيچ اۋستراليا چەمپيوناتىندا سەگىزىنشى مارتە توپ جاردى. ول وتكەن جىلى دا ۇزدىك شىققان بولاتىن. ءسويتىپ سەربيالىق سپورتشى دۇنيەجۇزىلىك رەيتينگتە قايتادان ءبىرىنشى راكەتكا اتانادى.

اۋستراليا بىرىنشىلىگىندە ەرلەر اراسىندا جەكەلەي سىندا قازاقستاندىقتار الەكساندر بۋبليك پەن ميحايل كۋكۋشكين العاشقى اينالىمنان اسا المادى. ەسەسىنە ولار جۇپتىق سىندا تابىستى ونەر كورسەتىپ، ەل تەننيسى تاريحىندا تۇڭعىش رەت «ۇلكەن دۋلىعا» تۋرنيرىندە جارتىلاي فينالعا دەيىن جەتتى.

ەسكە سالا كەتەيىك، بۇدان بۇرىن ايەلدەر اراسىندا اۋستراليا چەمپيوناتىنىڭ جەڭىمپازى انىقتالعانىن، قازاقستاندىقتاردى ۇتقان جۇپتىڭ چەمپيون اتانعانىن جازعان بولاتىنبىز.