امان، ەسەن، ءجۇرسىن - جامبىل وبلىسىندا دۇنيەگە كەلگەن ۇشەمگە وسىنداي ەسىم بەرىلگەن

تاراز. قازاقپارات - جامبىل وبلىسىندا جىل باسىندا ت. رىسقۇلوۆ اۋدانىنداعى قۇرماناليەۆتەر وتباسىندا ۇشەم دۇنيەگە كەلدى، - دەپ حابارلايدى قازاقپارات.

اۋدان اۋماعىنان شالعاي جاتقان اقنيەت اۋىلدىق وكرۋگىنىڭ ورتالىعى دىنمۇحامەد قونايەۆ اۋىلىندا تۇراتىن قۇرماناليەۆتەر وتباسى ءۇشىن جاڭا جىل جاعىمدى جاڭالىقپەن باستالعان. سەبەبى، ديدار مەن قىمباتتىڭ بۇعان دەيىن ديليارا جانە داريا ەسىمدى اپكەلى-ءسىڭلىلى ەكى قىزدارى بولسا، ەندى ولاردىڭ ءۇش ءىنىسى بار. بىرگە تۋعان شاقالاقتاردىڭ ۇشەۋى دە ەر بالا. ۇشەمنىڭ ەسىمدەرىن 58 جاستاعى داۋلەت اتالارى قازاقى ىرىمعا بالاپ «امان، ەسەن، ءجۇرسىن» دەپ قويىپتى.

اۋدان اكىمى ەربولات سادىرقۇلوۆ دىنمۇحامەد قونايەۆ اۋىلىنا ارنايى بارىپ، قۇرماناليەۆتەر اۋلەتىن قۇتتىقتادى. ءوز سوزىندە اۋدان باسشىسى ۇشەمنىڭ دەنساۋلىعى ءارقاشان ماڭىزدى ەكەنىن اتاپ ءوتىپ، جەرگىلىكتى بيلىك تاراپىنان شاقالاقتارعا بارلىق جاعداي جاسالاتىنىن دا ايتتى. سونداي-اق، امان، ەسەن، جۇرسىنگە بالالار ارباسى (كولياسكا) مەن جاڭاجىلدىق سىيلىقتار تابىس ەتتى.

«العاشقىدا ۋزي ناتيجەسى بەلگىلى بولعاندا ازداپ ۋايىمداعان بولاتىنبىز. ءبىراق، قازىر قۋانىشىمىزدا شەك جوق. انا مەن بالا دەنساۋلىعى ءۇشىن بارىن سالىپ ەڭبەك ەتىپ جۇرگەن اق حالاتتى ابزال جاندارعا العىسىم شەكسىز»، - دەيدى ول.

ايتا كەتەيىك، تۋعان ساتتە ۇشەمنىڭ ەكەۋىنىڭ سالماعى ەكى كەلى ءۇش ءجۇز گرامم بولسا، بىرەۋىنىكى ءبىر كەلى جەتى ءجۇز گرام بولعان ەكەن. قازىرگى كۇنى امان، ەسەن جانە ءجۇرسىننىڭ دەنساۋلىقتارى قالىپتى. اۋداندىق ورتالىق اۋرۋحانا مەن اۋىلدىق دارىگەرلىك ەمحانا تاراپىنان قاجەتتى كومەكتەردىڭ بارلىعى دەرلىك كورسەتىلۋدە ەكەن. بۇل جاس وتباسى ديدار مەن قىمباتتىڭ بەسىنشى سابيلەرى. ۇشەمنىڭ الدىندا ولاردىڭ ديليارا جانە داريا ەسىمدى اپكەلى-ءسىڭلىلى ەكى قىزدارى بار.