فۋتزالدان الەم چەمپيوناتى: قازاقستان العاشقى ويىنىن وتكىزدى

نۇر-سۇلتان. قازاقپارات - فۋتزالدان قازاقستان قۇراماسى الەم چەمپيوناتى ەليتالىق كەزەڭىندە العاشقى ويىنىن رۋمىنياعا قارسى وتكىزدى، دەپ حابارلايدى قازاقپارات ءتىلشىسى.

ەستەرىڭىزگە سالا كەتەلىك، 2-5- اقپان ارالىعىندا D توبىندا رۋمىنيا، سلوۆەنيا جانە چەحيا قۇرامالارىمەن سىنعا تۇسەدى. بۇگىن العاشقى تۋر ويىندارى وتكىزىلدى.

قازاقستان قۇراماسى جارىستىڭ نەگىزگى ىرىكتەۋ كەزەڭىندە دە رۋمىنيامەن كەزدەستى. وندا قازاقستاندىق فۋتزالشىلار 4:2 ەسەبىمەن جەڭىسكە جەتتى.

رۋمىنيا بۇگىنگى كۇنگە دەيىن الەم چەمپيوناتىنىڭ فينالدىق كەزەڭىندە ويىن كورسەتىپ كورگەن ەمەس. ەسەسىنە ەۋروپا چەمپيوناتىندا ءۇش مارتە باق سىناپ ۇلگەردى. العاش 2007-جىلى قۇرلىقتىق دوداعا قاتىسقان ولار توپتىق كەزەڭنەن ارىگە اسا العان جوق. ودان كەيىن 2012، 2014 -جىلداردا شيرەك فينالعا دەيىن جەتتى.

بۇگىنگى كەزدەسۋدە ويىن باسىنان قازاقستاندىق فۋتزالشىلار تىزگىندى قولعا الۋعا تىرىستى. العاشقى كەزەڭنىڭ ونە بويىندا قازاقستان قۇراماسى شابۋىل شەبىندە بوي كورسەتتى. دەسە دە رۋمىندار ءبىر عانا قاتەلىكتى شەبەر پايدالانىپ، 2-مينۋتتا العا شىقتى. ونى دۋميترۋ ستويكا ءوزىنىڭ ەنشىسىنە جازدى. ال 32-مينۋتتا رۋمىنيالىق ساۆيو ۆالدارەس ەكىنشى گول سوقتى. ال 33-مينۋتتا رۋمىن قاقپاشىسى توني تونيتا قازاقستاندىق قۇرامانىڭ بوس قالعان قاقپاسىن ءدال كوزدەدى. ويىننىڭ 38-مينۋتىندا قازاقستاندىق قاقپاشى يگيتا مەرگەندىگىمەن كوزگە ءتۇستى.

العاشقى ويىندا قازاقستان قۇراماسى كۇتپەگەن جەردەن قارسىلاسىنان 1:3 ەسەبىمەن جەڭىلىپ قالدى.

بۇگىن اتالمىش توپتا تاعى ءبىر ويىن ءوتتى. الاڭ يەلەرى - چەحيا قۇراماسى سلوۆەنيادان 3:1 ەسەبىمەن باسىم ءتۇستى.

قازاقستان قۇراماسى ەندى 3- اقپاندا سلوۆەنيامەن كەزدەسەدى.