كوروناۆيرۋس: قازاقستان قىتايدان باسقا ەلدەرمەن دە شەكارا بەكەتتەرىن باقىلاۋدى كۇشەيتپەك

نۇر- سۇلتان. قازاقپارات - دەنساۋلىق ساقتاۋ مينيسترلىگى قىتايمەن بىرگە باسقا ەلدەرمەن مەملەكەتتىك شەكاراداعى بەكەتتەردە دە سانيتارلىق باقىلاۋدى كۇشەيتپەك.

بۇل تۋرالى و ك ق- دا وتكەن باسپا ءسوز ءماسليحاتىندا دەنساۋلىق ساقتاۋ ءمينيسترى ەلجان ءبىرتانوۆ ءمالىم ەتتى، دەپ حابارلايدى قازاقپارات ءتىلشىسى.

«دۇنيەجۇزىلىك دەنساۋلىق ساقتاۋ ۇيىمىنىڭ توتەنشە جاعدايدىڭ جاڭا دەڭگەيىن جاريالاۋىنا بايلانىستى قوعامدىق دەنساۋلىق ساقتاۋ سالاسىندا قوسىمشا شارالار قابىلداندى. ەڭ ءبىرىنشى كەزەكتە بۇگىننەن باستاپ دەنساۋلىق ساقتاۋ مينيسترلىگى قىتاي عانا ەمەس، باسقا ەلدەرمەن دە مەملەكەتتىك شەكارادا ورنالاسقان بەكەتتەردە سانيتارلىق باقىلاۋدى كۇشەيتەدى. بۇل رەتتە ەڭ الدىمەن حالىقارالىق رەيستەر ورىندالاتىن اۋەجايلار، سونىمەن بىرگە ءبىزدىڭ ەلدىڭ حالىقارالىق تەڭىز جانە اۆتوكولىك جولدارىمەن شەكتەسەتىن شەكارالارى تۋرالى ايتىلىپ وتىر»، - دەدى ەلجان ءبىرتانوۆ.

اۆتور: ايان بەكەن ۇلى