قىتايدا كوروناۆيرۋستان ايىققان ادامدار سانى ارتىپ كەلەدى
كوروناۆيرۋستان ايىققاندار سانىنىڭ از بولۋى وسى اۋرۋدى ەمدەۋدىڭ ۇزاقتىعىنا بايلانىستى ەكەنىن اتاپ وتكەن ءجون. اۋرۋدىڭ جەڭىل بەلگىلەرى بار ناۋقاستار ءبىر اپتا ىشىندە ونى جەڭە الادى. ال اۋىر تۇرىمەن اۋىراتىن ناۋقاستارعا كەم دەگەندە ەكى اپتا قاجەت بولۋى مۇمكىن.
قىتايدا جانە الەمنىڭ ءتۇرلى زەرتحانالارىندا عالىمدار كوروناۆيرۋستىڭ جاڭا تۇرىنە قارسى ۆاكسينا جاساۋمەن اينالىسا باستاعاندا، قىتاي بيلىگى وسى اۋرۋدى دياگنوستيكالاۋ جانە ەمدەۋ ءۇشىن تاجىريبەلىك «ادىستەمە» ازىرلەدى. وندا ۆيرۋس تۋرالى جاڭا مالىمەتتەردى ەسكەرە وتىرىپ اقپارات ۇنەمى جاڭارىپ وتىرادى.
مەديتسينا عىلىمدارىنىڭ كانديداتى، ءداستۇرلى قىتاي مەديتسيناسىنىڭ بەيجىڭدىك «Jensin» كلينيكاسىنىڭ ديرەكتورى جاڭ شياۋ قازاقپاراتقا بەرگەن سۇحباتىندا 2003 -جىلى قىتاي تۇڭعىش رەت دۇنيەجۇزىلىك پروبلەماعا - اتيپيالىق پنيەۆمونياعا تاپ بولعاندا ەل تاريحىنداعى بارلىق ءداستۇرلى مەديتسينا ءۇشىن بۇل ۇلكەن بەتبۇرىس بولعانىن ايتتى.
«قازىرگى جاعدايدا دا جاڭا كوروناۆيرۋسپەن ءتيىمدى كۇرەسۋ ءۇشىن اسپان استى ەلى ءداستۇرلى قىتايلىق مەديتسيناعا سۇيەنەدى»، - دەدى جاڭ شياۋ.
ناۋقاستاردى دياگنوستيكالاۋ مەن ەمدەۋ پروتسەسىنەن بولەك، قىتايلىق دارىگەرلەر پاتسيەنتتەردى ايىعىپ شىققاننان كەيىن اۋرۋحانادان شىعارۋ پروتسەدۋراسىنا دا وتە مۇقيات قارايدى.
قىتاي حالىق رەسپۋبليكاسىنىڭ گيگيەنا جانە دەنساۋلىق ساقتاۋ بويىنشا مەملەكەتتىك كوميتەتى دەپارتامەنتى باسشىسىنىڭ ورىنباسارى جياو ياحۋيدىڭ ايتۋىنشا، اۋرۋحانادان ەمدەلىپ شىققانعا دەيىن ناۋقاستا اۋرۋدىڭ بەلگىلەرى بولماۋى كەرەك، دەنە قىزۋى قالىپتى بولۋى ءتيىس جانە ۆيرۋستىق نۋكلەين قىشقىلىنىڭ تالداماسى ەكى رەت تەرىس ناتيجە كورسەتۋى كەرەك.
