كوروناۆيرۋس: دارىگەرلەر اۋەجايعا كەلگەن جولاۋشىلاردى قالاي تەكسەرىپ جاتىر

نۇر- سۇلتان. قازاقپارات - كوروناۆيرۋستىڭ جاڭا ءتۇرىنىڭ پايدا بولۋىنا بايلانىستى ەلىمىزدەگى شەكارالار، ۆوكزالدار مەن اۋەجايلاردا باقىلاۋ كۇشەيدى.

قازاقستانعا كەلگەن جولاۋشىلاردى دارىگەرلەر جرۆي جانە كوروناۆيرۋستىق ينفەكسيا بەلگىلەرى بويىنشا تەكسەرۋدە. ب ا ق وكىلدەرىنە نۇرسۇلتان نازاربايەۆ حالىقارالىق اۋەجايىندا ازاماتتاردى قالاي تەكسەرەتىنى كورسەتىلدى، دەپ حابارلايدى قازاقپارات ءتىلشىسى.

«سانيتارلىق- كارانتيندىك باقىلاۋ جۇرگىزۋ ۇشاق بورتىنان باستالادى. شەكاراشىلار بورتقا كوتەرىلىپ، ەسىكتى قاعادى. وعان ءتيىستى قۇجاتتاردى الىپ كەلەدى. ودان كەيىن بورتقا سانيتارلىق دارىگەرلەر كىرىپ، جولاۋشىلارعا انكەتا تولتىرعىزادى جانە تەرمومەتريا جۇرگىزەدى» ، - دەيدى ق ر دەنساۋلىق ساقتاۋ مينيسترلىگىنىڭ كولىكتەگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ديرەكتورى ەرمەك توقبەرگەنوۆ.

ول جولاۋشىلار تەرمومەتريادان ۇشاق بورتىندا جانە ۇشاقتان تۇسكەن كەزدە وتەتىنىن ايتتى.

«ۇشاق ىشىندە ءار جولاۋشىنى تەكسەرەدى. سانيتارلىق دارىگەرلەردىڭ مىندەتى - بارلىق جولاۋشى مەن بارلىق ەكيپاج مۇشەسىن تەرمومەتريادان وتكىزۋ. ەگەر دەنە قىزۋى بار جولاۋشىلار انىقتالسا - ولاردى وقشاۋ جەرگە اپارادى. ءارى قاراي ولاردى ەمدەيتىن دارىگەرلەر قارايدى. جولاۋشىلار ۇشاقتان تۇسكەننەن كەيىن جىلۋ تۇسىرگىشتەرى بار (تەپلوۆيزور) جولمەن ءجۇرىپ وتەدى. ولار ونشا كورىنىپ تۇرعان جوق، سوندىقتان ونىڭ بار ەكەنىن جولاۋشىلار بايقامايدى» ، - دەيدى توقبەرگەنوۆ.

سونداي- اق، دەپارتامەنت ديرەكتورى سانيتارلىق دارىگەرلەر جولاۋشىلارعا انكەتا تولتىرتقىزاتىنىن ايتتى. ونىڭ ايتۋىنشا، دارىگەرلەر ولار قاي جاقتان ۇشىپ كەلگەنىن، قايدا بارىپ، قايدا تۇراتىنىن جازىپ الۋى كەرەك.

«جالپى العاندا ينكۋباتسيالىق كەزەڭ 14 كۇنگە سوزىلادى، سول سەبەپتى جولاۋشىلار مەديتسينالىق باقىلاۋدان ءوتۋى كەرەك. ولار دەنساۋلىق جاعدايى بويىنشا 14 كۇن بويى مونيتورينگ جۇرگىزەدى. ەگەر دەنە قىزۋى كوتەرىلگەن ادام بولسا، ءبىرىنشى قاباتتاعى مەديتسينالىق پۋنكتكە اپارادى. ول جەردە ەمدەيتىن دارىگەردەن بولەك ينفەكسيا ءبولىمىنىڭ دارىگەرلەرى بولىپ، ناۋقاستاردىڭ دەنساۋلىق جاعدايىن انىقتايدى. ەگەر ناۋقاس اۋرۋحاناعا جاتقىزىلۋى كەرەك دەپ شەشىلسە، اۋرۋحاناعا جاتقىزىلادى. بۇل جاعدايدا ناۋقاسقا تەرمومەتريا ءۇشىنشى رەت جاسالادى. كەستەگە سايكەس، ناۋقاس ساۋىقتىرۋ مەديتسينالىق مەكەمەلەرىنىڭ بىرىنە جاتقىزىلادى» ، - دەيدى ول.