اۋسترالياداعى ءورت: كانبەررادا توتەنشە جاعداي جاريالاندى
شەنەۋنىكتەردىڭ ايتۋىنشا، بۇل سوڭعى ونجىلدىقتاعى ەڭ قاۋىپتى ءورت بولىپ وتىر. ءورت اۋماقتىڭ وڭتۇستىگىندە 18500 گەكتار اۋماقتى شارپىعان. كانبەررا قالاسىنىڭ ماڭىنداعى تۇرعىنداردى ەۆاكۋاتسياعا دايىن بولۋعا شاقىردى. سيدنەي مەن مەلبۋرن اراسىندا ورنالاسقان شاعىن اۋداندا 400 مىڭ ادام تۇرادى.
2003 -جىلى كانبەررا قالاسىنىڭ ماڭىنداعى ورمان ورتىنەن ءتورت ادام قازا تاۋىپ، 500 دەن استامى زارداپ شەكتى جانە 470 ءۇي قيرادى.
«قازىر ەلوردا اۋماعىنا ورمان ورتىنە بايلانىستى قاۋىپ ءتونىپ تۇر» ، - دەپ مالىمدەدى جۇما كۇنى ەلوردا ءوڭىرىنىڭ باس ءمينيسترى ەندريۋ بارر.
«قازىرگى ۋاقىتتا ەلوردا اۋماقتىق ۇكىمەتى ءۇشىن ورمان ءورتىنىڭ قاۋپىنەن باسقا ماڭىزدى ماسەلە جوق» .
بارر مىرزا ءورتتىڭ «باعىنباي كەتۋى مۇمكىن ەكەنىن» ەسكەرتتى، سەبەبى اۋا تەمپەراتۋراسى جەلمەن بىرگە 40 گرادۋسقا دەيىن كوتەرىلدى. ول ورمان ءورتىنىڭ تاگگەرانونگ اۋدانىنان وڭتۇستىككە قاراي كانبەررا پارلامەنتى عيماراتىنان 20 مينۋتتىق جەردە قاتتى بولعانىن ايتتى. بارر ءورت ءسوندىرۋ ورگاندارىنا قوسىمشا كۇش، قۇرال جانە رەسۋرس بەرەتىن توتەنشە جاعدايدىڭ «كانبەرراعا قاۋىپ ءتونىپ تۇرعانعا دەيىن» جالعاساتىنىن ءمالىم ەتتى.
وتكەن بەيسەنبىدە كانبەررا اۋەجايىنىڭ اۋماعىنا ءورت جاقىنداعاندىقتان جابىلعان ەدى. ءۇش امەريكالىق ءورت ءسوندىرۋشى قالاعا جاقىن ماڭدا ورمان ءورتىن ءسوندىرىپ جاتىپ، ۇشاقتىڭ اپاتقا ۇشىراۋى سالدارىنان قازا تاپتى. اۋستراليادا قىركۇيەكتىڭ باسىنان بەرى ورمان ورتىنەن 33 ادام مەرت بولىپ، مىڭداعان ءۇي قيرادى. 11 ميلليوننان استام گەكتار جەر جانىپ كەتتى.
