كوروناۆيرۋس: موڭعوليادا وقۋشىلارعا ساباق تەلەارنالار ارقىلى وقىتىلادى

ۇلانباتىر. قازاقپارات - موڭعوليادا وقۋشىلارعا تەلەارنالار ارقىلى ساباق وقىتىلادى، دەپ حابارلايدى قازاقپارات ءتىلشىسى.

قىتاي حالىق رەسپۋبليكاسىنىڭ ۋحان قالاسىندا تۋىنداعان كورونوۆيرۋستىڭ قارقىندى تارالۋىنا بايلانىستى كورشىلەس موڭعوليادا ءبىلىم بەرۋ مەكەمەلەرىنىڭ جۇمىسى توقتاتىلىپ، ساقتىق شارالارى كۇشەيتىلدى.

قازىرگى تاڭدا وسى ەلدە بارلىق مەكتەپ، بالاباقشا، كاسىپتىك ءبىلىم بەرۋ مەكەمەلەرى مەن جوعارعى وقۋ ورىندارى 2- ناۋرىزعا دەيىن جابىلىپ، بۇقارالىق شارالاردىڭ ۇيىمداستىرىلۋىنا تىيىم سالىنىپ وتىر.

وسى ۋاقىت ارالىعىندا وقۋشىلارعا ەلدەگى ءىرى 18 تەلەارنا ارقىلى 1-12- سىنىپتىڭ ساباعىن وقۋ باعدارلاماسىنا سايكەس ۇيرەتىلەتىندىگىن سول ەلدىڭ ءبىلىم جانە عىلىم، سپورت ءمينيسترى ە. بااتاربيلەگ مالىمدەدى.

«بارلىعى 402 رەت جۇرىلەتىن تەلەساباقتىڭ جالپى اۋقىمى 6357 مينۋتتى، 40 ءپاندى قامتيدى. ول ءۇشىن ەڭ ۇزدىك دەگەن 170 مۇعالىم دايىندالىپ جاتىر. كۇنىنە 2-4 ءپان ءارقايسىسى 10-20 مينۋتتان ۇيرەتىلەتىن بولادى»، دەدى مينيستر ەلدەگى ب ا ق وكىلدەرىنە ارناپ جاساعان مالىمدەمەسىندە.

تەلەساباق اقپان ايىنىڭ 3 ىنەن باستاپ ەل كولەمىندە تەلەارنالار ارقىلى تاراتىلا باستايدى.