قۇتقارۋشىلاردى سىناماي، العىس ايتۋ كەرەك - مينيستر ابايەۆ
«مەن ءسىزدىڭ پىكىرىڭىزبەن كەلىسپەيمىن. ءبىزدىڭ ولكەدە قىس مەزگىلى وتە سۋىق بولاتىنىن جاقسى بىلەمىز، ءبىراق نۇر-سۇلتان قالاسىندا بيىل جاۋعان قار مولشەرى وتە كوپ. مۇنداي قۇبىلىس 55 جىل بۇرىن بولعان. بيىل جاۋعان قار مولشەرى بويىنشا رەكورد ورناتتى»، - دەدى داۋرەن ابايەۆ «اشىق ديالوگ» باعدارلاماسىندا.
ول قۇتقارۋ قىزمەتى ازاماتتار قار استىندا قالماس ءۇشىن قولدان كەلگەننىڭ ءبارىن جاساعانىن ايتتى.
«ەڭ باسىندا موبيلدى وپەراتور، ب ا ق، راديو ارقىلى تاسجولدار جابىق ەكەنى تۋرالى اقپارات تاراتىلىپ، قانداي جاعداي بولسا دا جولعا شىعۋعا بولمايتىنى تۋرالى حابارلانادى. ادام ءومىرى بارىنەن ماڭىزدى ەكەنىن ۇمىتۋعا بولمايدى. بوران بولعان كۇندەرى ەلىمىز بويىنشا 1500 ادام مەن 600 دەن استام تەحنيكا قۇتقارۋ جۇمىستارىنا جۇمىلدىرىلدى. بۇل كەزدە ت ج ك عانا ەمەس، اسكەري قىزمەتكەرلەر، پوليتسيا قىزمەتكەرلەرى، جول قىزمەتى مەن اكىمدىك قىزمەتكەرلەرى، دارىگەرلەر دە جۇمىلدىرىلدى. بۇل ادامدار تاۋلىك بويى جۇمىس ىستەدى»، - دەدى ول.
سونداي-اق، مينيستر قىزمەتىنە ادال ماماندار تۋرالى مىسال كەلتىردى.
«بوراندى كۇندەردىڭ بىرىندە پاۆلودار وبلىسىنداعى جەتەكشى اۋىلىنىڭ تۇرعىنىندا ينفاركت بولعان. قار قالىڭ بولعاندىقتان جەدەل جاردەم كولىگى ءۇيدىڭ اۋلاسىنا جەتە الماي قالعان. دارىگەرلەر ۇيگە جاياۋ جەتىپ، ناۋقاستى ەكى شاقىرىم قاشىقتىقتا تۇرعان كولىككە دەيىن زەمبىلمەن كوتەرىپ الىپ كەلگەن. مۇنداي ماماندار قانداي قۇرمەتكە بولسىن لايىقتى. تاعى ءبىر مىسال: تەمىرتاۋ-قاراعاندى باعىتىنداعى تاسجولدا دامير قۇدايبەرگەنوۆ ەسىمدى ازامات پاترۋلدۋگە شىعارىلعان. ول ارىپتەستەرىمەن بىرگە 40 ادامنىڭ ءومىرىن قۇتقارىپ قالدى. ونىڭ فوتوسۋرەتى قازنەتتە تاراپ كەتتى. قۇتقارۋشىلاردىڭ كومەگىمەن 3 مىڭنان استام ادام ەۆاكۋاتسيالاندى. بۇل ساندار وسە بەرۋى مۇمكىن. قۇتقارۋشىلاردى سىناماي، العىس ايتۋ كەرەك. جولدا قالعاندارعا، قۇتقارۋشىلارعا ءوز ەركىمەن كومەكتەسكەن ادامدار تۋرالى دا ۇمىتپاۋىمىز كەرەك. ولاردىڭ ءبىرى ىستىق تاماق الىپ كەلسە، ەندى ءبىرى بەنزين بەرىپ، ەندى ءبىرى جاتاتىن جەر ۇسىندى»، - دەيدى ابايەۆ.
