ازەربايجاندا اباي جىلى باستالدى
شارانى حالىقارالىق تۇركى اكادەمياسى، ازەربايجان ءبىلىم مينيسترلىگى، ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى، باكۋ مەملەكەتتىك ۋنيۆەرسيتەتى جانە ازەربايجانداعى قازاقستان ەلشىلىگى بىرلەسىپ ۇيىمداستىردى. سالتاناتتى شارانىڭ اشىلۋىن تۇركى كەڭەسىنىڭ باس حاتشىسى ب. امىرەيەۆ، حالىقارالىق تۇركى اكادەمياسىنىڭ پرەزيدەنتى د. قىدىرالى، تۇركپا باس حاتشىسى ا. مامايۋسۋپوۆ، تۇركى مادەنيەتى مەن مۇراسى قورىنىڭ جەتەكشىسى گ. ەفەنديەۆا، تۇركسوي باس حاتشىسىنىڭ ورىنباسارى ب. چاكىدجى، بمۋ رەكتورى ە. بابايەۆ، ەۋرازيا جازۋشىلار وداعىنىڭ ءتوراعاسى ياكۋب ومەروگلۋ، ازەربايجان جازۋشىلار وداعىنىڭ ءتوراعاسى انار رزايەۆ، قازاقستان، قىرعىزستان، تۇركيا، ماجارستان ەلشىلەرى، سونىمەن قاتار تانىمال عالىمدار مەن قوعام قايراتكەرلەرى قاتىستى.
سالتاناتتى شارا باستالماس بۇرىن قوناقتار باكۋ مەملەكەتتىك ۋنيۆەرسيتەتىندە جۇمىس ىستەپ تۇرعان اباي ورتالىعىنا بارىپ، كورمەگە قويىلعان كىتاپتارمەن تانىستى. حالىقارالىق تۇركى اكادەمياسىنىڭ پرەزيدەنتى دارحان قىدىرالى ورتالىققا 60 قا جۋىق كىتاپ، ونىڭ ىشىندە قازاق تىلىندەگى اباي شىعارمالارىن تارتۋ ەتتى. سونىمەن قاتار ازەربايجان ۇلتتىق عىلىم اكادەمياسى نيزامي اتىنداعى ادەبيەت ينستيتۋتىنىڭ عىلىمي قىزمەتكەرى تۇران تەيمۋردىڭ «مۇحتار اۋەزوۆتىڭ «اباي» رومانىنداعى كوركەمدىك ماسەلەلەر» (Turan Teymur. Muxtar Auezovun «Abay» romanında sənətkarlıq məsələləri) مونوگرافياسىنىڭ تۇساۋكەسەرى ءوتتى. اكادەميادا جارىق كورىپ وتىرعان بۇل ەڭبەك مۇحتار اۋەزوۆتىڭ شىعارماشىلىعىنا ارنالعان ازەربايجان تىلىندەگى العاشقى عىلىمي تۋىندى سانالادى.
د. قىدىرالى ابايدىڭ 175 جىلدىق مەرەيتويىن تويلاۋ اتاۋلى وقيعا ەكەندىگىن ايتا كەلە اباي جىلى تۇركى حالىقتارى اراسىنداعى مادەني قاتىناستاردىڭ دامۋىنا قىزمەت ەتەتىندىگىنە سەنىم ءبىلدىردى. ال باكۋ مەملەكەتتىك ۋنيۆەرسيتەتىنىڭ رەكتورى ە. بابايەۆ قازاقستاندىق جوعارى وقۋ ورىندارىمەن بايلانىستارعا وڭ باعا بەرىپ، ەكى ەلدىڭ اراسىندا تاريحي بايلانىستار، باۋىرلاستىقتىڭ بەرىك تامىرى بار ەكەندىگىن باسا ايتتى.
سالتاناتتى شارا ل. گۋميليەۆ اتىداعى ە ۇ ۋ پروفەسسورى، قازاقستاننىڭ ەڭبەك سىڭىرگەن ءارتىسى كەنجەعالي مىرجىقبايدىڭ اباي جىلىنىڭ اشىلۋىنا ارنالعان كونسەرتتىك باعدارلاماسىمەن جالعاستى.
ايتا كەتەرلىگى، تۇركى اكادەمياسى UNESCO اياسىندا اباي مەرەيتويىنا ارنالعان حالىقارالىق شارالاردى ازەربايجان، قازاقستان، قىرعىزستان، تۇركيا ەلدەرىندە وتكىزىپ، ۇلى اقىننىڭ شىعارمالارىن جانە م. اۋەزوۆتىڭ «اباي جولى» ەپوپەياسىن تۇركى تىلدەرىنە اۋدارۋدى جوسپارلاپ وتىر.
