قازاقستان- قىتاي شەكاراسىندا ىستىعى كوتەرىلگەن ەكى جىگىتتىڭ سىناماسىنان ۆيرۋس تابىلمادى

تالدىقورعان. قازاقپارات - قىتايدان قازاقستانعا وتكەن ەكى قازاقستاندىقتىڭ ىستىعى كوتەرىلىپ، دارىگەرلەر ولاردان ارنايى سىناما العان بولاتىن.

پانفيلوۆ اۋدانى اكىمىنىڭ باسپا ءسوز قىزمەتى تاراتقان اقپاراتقا سايكەس، اۋرۋحاناعا جەتكىزىلگەن جىگىتتەردىڭ دەنساۋلىعىنا ەشقانداي قاۋىپ ءتونىپ تۇرعان جوق، دەپ حابارلايدى قازاقپارات ءتىلشىسى.

28 - قاڭتاردا پانفيلوۆ اۋدانىنداعى «Nur joly» بەكەتىنەن وتكەن قازاقستاننىڭ ەكى ازاماتىنىڭ تەمپەراتۋراسى كوتەرىلگەنىن ارنايى قۇرىلعى انىقتاعان بولاتىن. ولار اۋداندىق ينفەكتسيالىق ەمحاناعا شۇعىل جەتكىزىلدى. ارنايى ماماندار زەرتتەۋ سىناماسىن الىپ، ەكى ازاماتپەن قارىم قاتىناستا بولعان 20 ادامدى تولىق تەكسەرۋدەن وتكىزگەن. زەرتتەۋ قورىتىندىسىنا سايكەس ەكى ازاماتتان ەشقانداي ۆيرۋستىڭ بەلگىلەرى بايقالمادى. ەكى جىگىت بۇگىندە ەمحانادان شىعىپ، ۇيلەرىنە قايتارىلدى.

ايتا كەتەيىك، اۋدانداعى «قورعاس» شەكارا ماڭى حالىقارالىق ىنتىماقتاستىق ورتالىعى 22 - قاڭتاردان باستاپ جابىلدى. ال، 29 - قاڭتاردان باستاپ «Nur joly» وتكىزۋ پۋنكتىنەن جولاۋشىلاردى تاسىمالدايتىن اۆتوبۋستاردىڭ قاتىناسى توقتاتىلدى.