ساپاربايەۆ ەڭ تومەنگى جالاقىنى كوتەرۋگە قاتىستى تۇسىنىك بەردى
«قازىرگى كەزدە وسى ماسەلەنى پىسىقتاپ جاتىرمىز. بۇل ءبىرىنشى كەزەكتە وسى قادامدارعا قانشا قارجى قاجەت بولاتىنىنا، سونداي- اق قارجىلىق مۇمكىندىككە بايلانىستى»، - دەدى ب. ساپاربايەۆ پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ.
وسى ورايدا ول ەڭ تومەنگى كۇنكورىس دەڭگەيىن، ەڭ تومەنگى جالاقىنى قايتا ەسەپتەۋ كەرەكتىگىن اتاپ ءوتتى.
«پرەزيدەنتتىڭ حالىقتىڭ تابىسىن ارتتىرۋ جونىندە تاپسىرماسى بار. حالىقتىڭ تابىسى ەڭ تومەنگى كۇنكورىس دەڭگەيىنە جانە ەڭ تومەنگى جالاقىعا قاتىستى بولىپ تۇر» ، - دەدى ۇكىمەت باسشىسىنىڭ ورىنباسارى.
سونىمەن قاتار ول ەڭ تومەنگى جالاقىنى كوتەرۋدىڭ قارجىلاندىرۋ كوزى تۋرالى ايتىپ بەردى.
«بۇل ءوز كەزەگىندە ەل بيۋدجەتىنە قاتىستى. ءبىز الدىمەن ەسەپتەۋلەردى جۇرگىزۋىمىز كەرەك، كەيىننەن بيۋدجەتتىڭ قارجىلىق مۇمكىندىگىن قاراۋ قاجەت. ەڭ باستىسى، بۇل شارالاردى ىسكە اسىرۋ ءۇشىن ەكونوميكا، ادامدار جۇمىس ىستەۋى ءتيىس. سايكەسىنشە، ەكونوميكا ءوسىمىن قامتاماسىز ەتۋ كەرەك. سول كەزدە تابىس بولىپ، اتالعان كورسەتكىشتى كوتەرۋدىڭ كوزدەرى ايقىندالادى» ، - دەدى ب. ساپاربايەۆ.
