رەسەي قىتايدان ازاماتتارىن قايتارىپ جاتىر
5 رەسەيلىك اۋەكومپانيا قىتايمەن قاتىناسىن توقتاتتى. سونداي- اق وپەراتورلار بۇل ەلدەن تۋريستتەردى قابىلدامايتىن بولدى. بۇل شارالار رەسەيدىڭ اۋە تاسىمالى جانە تۋريزم سالالارىنا زور شىعىن كەلتىرەتىن ءتۇرى بار.
رەسەيدىڭ بەلگىلى دارىگەرى الەكساندر ەديگەر كوروناۆيرۋستىڭ جاڭا تۇرىنەن شوشۋعا نەگىز جوق دەيدى. بۇل سىرقاتتىڭ اجال كورسەتكىشى % 3,5 عانا، ال اۋرۋدىڭ ءوزى وسىعان دەيىن بولعان دوڭىز تۇماۋى مەن وكپە قابىنۋىنىڭ اتيپيالىق تۇرىنەن جەڭىل وتەدى. ول ۆيرۋستىڭ تارالۋىمەن قاتار ونىڭ توڭىرەگىندە تۋىنداعان جالعان اقپارات جانە دۇربەلەڭمەن دە كۇرەسۋ قاجەت دەپ سانايدى.
الەكساندر ەديگەر، توكسيكولوگ:
- بايبالامعا باسپاۋ كەرەك. ءبىز جەكە دەڭگەيدە جانە جاپپاي تۇردە ۇلكەن سترەسسكە ۇشىراپ وتىرمىز، ال مۇنىڭ ءوزى جۇرەك اۋرۋلارىنا شالدىققان كەيبىر ادامداردى اجالعا اكەلۋى مۇمكىن.
الايدا قاراپايىم ادامداردان گورى تۋريزم سالاسىنىڭ وكىلدەرى سارى ۋايىمعا باتتى. قازىر رەسەيدەن قىتايعا 19 اۋەكومپانيا قاتىنايدى، ولاردىڭ بەسەۋى ساپارلارىن توقتاتتى. جولاۋشىلار بىرلەستىگىنىڭ باسشىسى يليا زوتوۆ رەسەيدىڭ ۋكراينا، گرۋزيا جانە مىسىرمەن اۋەقاتىناسى جوق ەكەنىن ەسكە سالدى. مۇنداي جاعدايدا قىتاي باعىتىنىڭ جابىلۋى سالاعا اۋىر سوققى بولماق.
يليا زوتوۆ، بۇكىل رەسەيلىك جولاۋشىلار بىرلەستىگىنىڭ ءتوراعاسى:
- ۆيرۋس تاراي باستاعالى، قىتايعا قاتىنايتىن جولاۋشىلار سانى % 30 ازايدى. بۇل قاڭتار ايىنىڭ كورسەتكىشى. وسىدان كەلەتىن زور شىعىننىڭ ورنىن تولتىرۋعا بيۋدجەتتىڭ دە، كومپانيالاردىڭ دا مۇمكىندىكتەرى جوق. كوپتەگەن ءىرى تۋريستىك جانە اۋە كومپانيالاردى كۇيرەۋدەن ساقتاپ، سالانى قۇتقارۋعا تۋرا كەلەدى.
وتكەن جىلى رەسەيگە شامامەن ءبىر ميلليون 300 مىڭ قىتايلىق تۋريست ساياحاتتاپ كەلگەن. تەك جىلدىڭ العاشقى 6 ايىندا ولار ەل قازىناسىنا ءبىر ميلليارد دوللار تابىس اكەلدى. قازىر قىتاي تۋريستتەرى ءۇشىن ەل جابىلدى.
دارىگەرلەردىڭ بولجاۋىنشا، ىندەتتىڭ شارىقتاۋ شەگى اقپان ايىنىڭ ورتاسىنا كەلەدى. بۇل اقپان، ناۋرىز جانە ءساۋىر ايلارىندا تۋريزم سالاسىنا ماماندانعان كومپانيالار جۇمىسسىز قالاتىنىن بىلدىرەدى.
الەكسەي ۆولكوۆ، قوناقجايلىق سالاسى وداعىنىڭ ۆيتسە- پرەزيدەنتى:
- تۋروپەراتورلار عانا ەمەس، قوناقجايلىق سالاسىنىڭ تۇگەلى شىعىنعا ۇشىرايدى. وعان مۇراجايلار، قوناقتاردى جايعاستىرۋ ورىندارى، كولىك كومپانيالارى جاتادى. جاقىن ارادا اۋەكومپانيالاردىڭ كوبىسى قىتايعا ساپارلارىن دوعارادى دەپ بولجاپ وتىرمىز.
ۆيرۋس بيزنەستىڭ وزگە سالالارىنا دا زيان كەلتىردى. تەڭىز شايانىن ەكسپورتتاۋشى كومپانيالار قىتايدا ءوز ونىمىنە سۇرانىستىڭ تومەندەۋىنە بايلانىستى جىلدىڭ ءبىرىنىشى شيرەگىندە ءوز شىعىنىن كەم دەگەندە 80 ميلليون دوللارعا باعالاپ وتىر.
www.24.kz
