قىتايدان ەلگە كەلەتىن ستۋدەنتتەرگە ۇشاق دايىن - بەردىبەك ساپاربايەۆ

نۇر- سۇلتان. قازاقپارات - قىتايداعى ستۋدەنتتەردى الىپ كەلۋگە ۇشاق دايىن. بۇل تۋرالى ق ر پرەمەر- ءمينيسترىنىڭ ورىنباسارى بەردىبەك ساپاربايەۆ ءمالىم ەتتى، دەپ حابارلايدى قازاقپارات ءتىلشىسى.

«قازىرگى تاڭدا قانداي شارالار قولدانىلعانى جونىندە ايتتىم. كەشە ءبىز بۇقارالىق اقپارات قۇرالدارىنا قولعا الىنعان شارالار تۋرالى حابارلادىق. قازىر ءبىز قىتاي حالىق رەسپۋبليكاسىنىڭ سىرتقى ىستەر مينيسترلىگىمەن جۇمىس ىستەپ جاتىرمىز. سونداعى ءبىرىنشى كەزەكتە ءبىزدىڭ ستۋدەنتتەردى الىپ كەلۋ جونىندەگى شارالار پىسىقتالدى. ەكىنشىدەن، سونداعى تۋريستەردى جەتكىزۋ. تۋريستەر 680 بولعان، ولاردىڭ جارتىسى ەلگە ورالدى. ءبىزدىڭ ەسەبىمىز بويىنشا بۇگىن نەمەسە ەرتەڭ تولىعىمەن ەلگە كەلۋى كەرەك» ، - دەدى ب. ساپاربايەۆ پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ.

سونىمەن قاتار ول قىتايداعى ستۋدەنتتەر ماسەلەسىنە دە توقتالدى.

«ەلگە كەلەمىز دەگەن ستۋدەنتتەرگە ۇشاق دايىنداپ قويدىق. وزدەرىڭىز بىلەسىزدەر، ەكى ەلدىڭ اراسىندا ءتيىستى كەلىسىمشارتتار بار. سوعان سايكەس جۇمىس ىستەۋىمىز كەرەك» ، - دەدى ۇكىمەت باسشىسىنىڭ ورىنباسارى.

سونىمەن قاتار، ب. ساپاربايەۆ ۇكىمەت باسشىسى قوسىمشا قۇرالدار، ماسكالار، تاعى دا كەرەك اتتار الۋ ءۇشىن قاۋلىعا قول قويعانىن اتاپ ءوتتى.

«وعان قوسىمشا 1,5 ميلليارد تەڭگە بولىنگەن. ونىڭ ۇستىنە، ءوزىمىزدىڭ قورىمىز دا بار، جەرگىلىكتى جەرلەردە بەرىلەتىن كومەك بار. ياعني، كومەكتى نەمەسە مەديتسينالىق قولداۋدى قاجەت ەتەتىن ازاماتتار بولسا، وعان ءبىزدىڭ قارجىمىز دا، مۇمكىندىكىمىز دە بار» ، - دەدى پرەمەر- ءمينيستردىڭ ورىنباسارى.

بۇدان بۇرىن حابارلانعانداي، ق ر ءبىلىم جانە عىلىم ۆيتسە- ءمينيسترى ميراس داۋلەنوۆ قىتايداعى جوعارى وقۋ ورىندارىندا وقىپ جۇرگەن قازاقستاننىڭ ستۋدەنتتەرىنە دەمالىس مەرزىمىن ۇزارتۋ شارالارى پىسىقتالىپ جاتقانىن ايتتى.

قىتايدىڭ ۋحان قالاسىندا 400 ستۋدەنت وقىپ ءجۇر. سونىڭ ىشىندە 98 ى سول قالادا، ياعني ولار وقۋ ورنىنىڭ كامپۋسىندا.