جاپونيادا ۋحاننان كەلگەن ءۇش ازامات ۆيرۋس جۇقتىرعان
بۇل تۋرالى Kyodo ۇلتتىق اقپارات اگەنتتىگى حابارلادى.
سارسەنبى كۇنى ۋحان قالاسىنان توكيوعا 206 ادام كەلگەن. بەيسەنبى كۇنى ۇكىمەت جالعا العان رەيسپەن تاعى 210 جاپوندىق ۇيلەرىنە جەتكىزىلدى.
ەلدىڭ دەنساۋلىق ساقتاۋ مينيسترلىگىنىڭ مالىمەتىنشە، ولاردىڭ كەيبىرى جوتەلگەن. ءبىرىنشى توپتا ەكى ادامنان باسقاسىنىڭ بارلىعى ۆيرۋس انىقتايتىن تەست جاساۋعا كەلىسىم بەرگەن.
ۇكىمەت ۋحاننان ۇيلەرىنە قايتقىسى كەلەتىن تاعى 200 جاپونيا ازاماتى ءۇشىن ءۇشىنشى رەيس جىبەرۋدى ۇيىمداستىرىپ جاتىر. جاپونيا بيلىگى ق ح ر- دان كەلگەندەردى وقشاۋلاپ، ۋاقىتشا باسپانا رەتىندە قوعامدىق عيماراتتارعا ورنالاستىرۋدى كوزدەپ وتىر. مەملەكەت ادامنان ادامعا جۇعاتىن ۆيرۋستىڭ الدىن الۋ ءۇشىن جوعارى دايىندىقتا وتىر.
وسى اپتادا جاپونيادا تۋريستىك اۆتوبۋس جۇرگىزۋشىسى مەن گيد قىتايعا بارماي-اق ۆيرۋس جۇقتىرعان. بۇل كۇنشىعىس ەلىندەگى ۆيرۋستىڭ العاشقى تارالۋ جاعدايى.
بۇگىن دۇنيەجۇزىلىك دەنساۋلىق ساقتاۋ ۇيىمى ق ح ر- دا كوروناۆيرۋستىڭ ورشۋىنە بايلانىستى شۇعىل جيىن وتكىزبەك. بۇل تۋرالى د د س ۇ مالىمدەمەسىندە ايتىلعان. دۇنيەجۇزىلىك دەنساۋلىق ساقتاۋ ۇيىمىنىڭ ەسەبىنە سايكەس، سارسەنبى كۇنگى دەرەك بويىنشا قىتاي مەن جاپونيادان بولەك تاعى 14 ەلدە، سونىڭ ىشىندە تايلاند، اۋستراليا، سينگاپۋر جانە ا ق ش- تا ۆيرۋس جۇقتىرعاندار انىقتالعان.
