قازاقستانعا جالعان قۇجاتپەن اكەلىنگەن اسىل تۇقىمدى سيىرلار انىقتالدى
ايتا كەتسەك، بىلتىردان بەرى قازاقستانعا چەح رەسپۋبليكاسىنان اۋىل شارۋاشىلىق جانۋارلارىن (تىرىدەي) كىرگىزۋگە ۋاقىتشا شەكتەۋ قويىلعان. زاڭدى بۇزعان كاسىپكەرلەرگە ءىرى قارانى جونەلتۋشى ەلگە قايتا قايتارۋ تۋرالى نۇسقاۋ بەرىلدى.
ق ر اۋىل شارۋاشىلىعى مينيسترلىگىنىڭ ۆەتەريناريالىق باقىلاۋ جانە قاداعالاۋ كوميتەتى «اگرو-كومپلەكس-سۋلىشوك» كومپانياسىنا سلوۆاكيادان 50 باس اسىل تۇقىمدى ءىرى قارا مالىن (SEVITA s.r.o. - جۇك جونەلتۋشى) يمپورتتاۋعا ۆەتەرينارلىق رۇقسات بەرگەن بولاتىن.
«الايدا قۇجاتتاردى، ونىڭ ىشىندە 2019-جىلعى 8- قازانداعى SVS /2019/120824- J ۆەتەرينارلىق سەرتيفيكاتىن تەكسەرۋ بارىسىندا جانۋارلاردىڭ شىققان ەلى چەح رەسپۋبليكاسى ەكەنى انىقتالدى. ال، چەح رەسپۋبليكاسىنىڭ ۋاكىلەتتى ورگاندارى بىرنەشە رەت جالعان ۆەتەريناريالىق سەرتيفيكاتتار مەن كۋالىكتەر بەرۋ ارقىلى قاراپايىم جانۋارلاردى «اسىل تۇقىمدى» مال رەتىندە ەكسپورتتاۋ فاكتىلەرى تىركەلگەن بولاتىن. اتالمىش جاعداي بويىنشا قازىرگى ۋاقىتتا سوت پروتسەستەرى وتۋدە»، دەلىنگەن حابارلامادا.
چەح رەسپۋبليكاسىنان جانۋارلاردى اكەلۋگە شەكتەۋ قويىلۋىنا بايلانىستى ق ر ا ش م ۆەتەريناريالىق باقىلاۋ جانە قاداعالاۋ كوميتەتىنىڭ سولتۇستىك قازاقستان وبلىستىق اۋماقتىق ينسپەكتسياسى «اگرو-كومپلەكس-سۋلىشوك» ج ش س باسشىلىعىنا جانۋارلاردى جونەلتۋشى ەلگە قايتا قايتارۋ قاجەتتىلىگى تۋرالى نۇسقاۋ بەردى.
