ەۋروپارلامەنت ۇلى بريتانيانىڭ ە و- دان شىعۋ كەلىسىمىن ماقۇلدادى

بريۋسسەل. قازاقپارات - ەۋروپالىق پارلامەنت سارسەنبى كۇنى كەشكە ۇلى بريتانيانىڭ ەۋروپالىق وداقتان شىعۋ تۋرالى كەلىسىمىن قولدادى، دەپ حابارلايدى «قازاقپارات» ح ا ا مەنشىكتى ءتىلشىسى.

ەۋروپارلامەنتتىڭ 621 دەپۋتاتى قۇجاتقا قولداۋ بىلدىرسە، 49 ى كەلىسىمگە قارسى بولدى، تاعى 13 دەپۋتات - قالىس قالدى.

ايتا كەتەيىك، ە و مەن ۇلى بريتانيا بلوكتان شىعۋ شارتتارى تۋرالى قاراشا ايىندا ۋاعدالاسقان بولاتىن. وتكەن اپتادا ەۋروكوميسسيا باسشىسى ۋرسۋلا فون دەر ليايەن جانە ەۋروپالىق كەڭەس پرەزيدەنتى شارل ميشەل كەلىسىمگە قول قويدى.

ەندى، ۇلى بريتانيا جانە ەۋروپا پارلامەنتتەرى كەلىسىمدى راتيفيكاتسيالاعاننان كەيىن، مۇشەلىگىندە 27 مەملەكەت بار ە و كەڭەسى وسى اپتادا قۇجاتتى ماقۇلداۋى ءتيىس. بۇل، بىرىككەن كورولدىككە بلوكتان 31- قاڭتاردا شىعۋعا مۇمكىندىك بەرەدى.

ۇلى بريتانيا قوعامداستىقتان شىققاننان كەيىن اتالمىش ەلدىڭ ە و- مەن ودان ارعى قارىم-قاتىناسى تۋرالى كەلىسسوزدەر بيىلعى ناۋرىز ايىنىڭ باسىندا باستالاتىنى كۇتىلەدى.