قىتايدا ورشىگەن كوروناۆيرۋس قازاقستان اۋماعىندا تىركەلگەن جوق - بەكشين

نۇر- سۇلتان. قازاقپارات - قىتايدا ءورشىپ جاتقان كوروناۆيرۋس قازاقستان اۋماعىندا تىركەلگەن جوق. بۇل تۋرالى بۇگىن ورتالىق كوممۋنيكاتسيالار ورتالىعىندا وتكەن بريفينگتە ق ر دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى ءتوراعاسىنىڭ ورىنباسارى جانداربەك بەكشين ءمالىم ەتتى، دەپ حابارلايدى قازاقپارات ءتىلشىسى.

«دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، قىتاي حالىق رەسپۋبليكاسىندا 23 - قاڭتارعا دەيىن كوروناۆيرۋستىق ينفەكسيانى جۇقتىرۋدىڭ 571 جاعدايى تىركەلىپ، 17 ادام كوز جۇمدى. قىتاي ەپيدەميولوگتارىنىڭ اقپاراتىنا سايكەس، بۇل ينفەكسيا ۋحان قالاسىندا ورنالاسقان حۋانان تەڭىز ونىمدەرىنىڭ كوتەرمە ساۋدا بازارلارىندا تارالۋدا. ول جاقتا تەڭىز ونىمدەرى مەن جانۋارلار ونىمدەرىن ساتاتىن 7 بازار بار»، - دەيدى جانداربەك بەكشين.

ول بۇل ينفەكسيانىڭ پايدا بولۋ جانە تارالۋ جولدارى ناقتى دالەلدەنبەگەنىن اتاپ ءوتتى.

«اۋىرعان ادامداردىڭ كوبى بازارلارمەن بايلانىستى بولعاندىقتان باسا نازار اۋدارىپ جاتىر. ول جەردە بىرەۋ - ساتۋشى، ەندى ءبىرى - ءوندىرۋشى، ساتىپ الۋشى. دۇنيەجۇزىلىك دەنساۋلىق ساقتاۋ ۇيىمى بۇرىن بۇل ينفەكسيا ادامنان ادامعا جۇقپايتىنىن ايتسا، قازىرگى ۋاقىتتا ادامنان ادامعا جۇققان جاعدايلار بار ەكەنىن ايتۋدا. ۆيرۋس بيىك كونتسەنتراتتى بولعان كەزدە ادامنان ادامعا جۇعادى. ءبىز ۋحان قالاسىنداعى جاعدايدى تاۋلىك بويى نازارعا الىپ جاتىرمىز. قازىرگى ۋاقىتتا ق ح ر جەرگىلىكتى بيلىگى بۇل قالانى كارانتينگە قويدى»، - دەيدى ول.

سونداي- اق كوميتەت ورىنباسارى قازاقستاندا بۇل جاعدايعا بايلانىستى قانداي شارالار قولعا الىنعانىن ايتتى.

«ۋحان قالاسى كارانتينگە قويىلدى. دەمەك، قالاعا كىرۋگە دە، شىعۋعا دا بولمايدى. بۇل - وتە دۇرىس شەشىم. ءوز تاراپىمىزدان قازاقستاندىقتارعا، اسىرەسە اۋە جولىمەن جۇرەتىندەرگە ءتۇسىندىرۋ جۇرگىزىپ جاتىرمىز. باس سانيتارلىق دارىگەردىڭ 6- قاڭتار كۇنگى قاۋلىسى بويىنشا، قىتايدان كەلە جاتقان جولاۋشىلار تەرمومەتريادان وتەدى. قازىرگى تاڭدا 13 مىڭنان استام جولاۋشى تەرمومەتريادان ءوتتى. ينفەكسيانى انىقتاۋ جاعدايلارى تىركەلمەدى. اۋەجايلاردا كارانتين پۋنكتى ورنالاسقان. ۋحان قالاسىنان قازاقستانعا تىكەلەي رەيس جوق. ءبىراق الماتىدان ق ح ر- عا - 5 رەيس، نۇر- سۇلتان قالاسىنان 3 رەيس بار. وسى رەيستەرگە ۇلكەن ءمان بەرىلەدى. سونداي- اق، شەكارالىق جەرلەردە دە جاعداي قاتاڭ باقىلاۋعا الىنعان. ەكىنشىدەن، ۇشاقتاعى ەكيپاج مۇشەلەرىمەن جۇمىس جاساپ جاتىرمىز. ولارعا اۋرۋ بەلگىلەرى قانداي بولاتىنىن تۇسىندىرىلۋدە. ۇشاقتار 6 ساعاتتان استام ۋاقىت ۇشادى. سول كەزدە جولاۋشىلاردىڭ دەنە قىزۋى كوتەرىلسە، جوتەلسە، ەنتىكسە، بويىن السىزدىك بيلەسە - ءمان بەرۋلەرى كەرەك. تۇماۋ مەن كوروناۆيرۋستىق ينفەكسيانىڭ بەلگىلەرى ۇقساس، وسى جاعىنان انىقتاۋعا قيىندىق تۋادى»، - دەدى ج. بەكشين.

ەسكە سالا كەتسەك، بۇعان دەيىن قازاقستان قىتايداعى كوروناۆيرۋسقا بايلانىستى شەكارادا باقىلاۋ شارالارىن كۇشەيتكەنىن جازعان بولاتىنبىز.

اۆتور زارينا قاھارمان