قىتاي بوكستان ليتسەنزيالىق تۋرنيردى بەلگىسىز ۋاقىتقا كەيىنگە شەگەردى

نۇر-سۇلتان. قازاقپارات - قىتايدىڭ ۋحان قالاسىندا ءوتۋى ءتيىس بولعان بوكستان ازيالىق كۆاليفيكاتسيالىق تۋرنير بەلگىسىز ۋاقىتقا كەيىنگە شەگەرىلدى.

بۇل تۋرالى ق ر ۇلتتىق وليمپيادالىق كوميتەتى جارىستى ۇيىمداستىرۋ كوميتەتىنە سىلتەمە جاساپ ءمالىم ەتتى، دەپ حابارلايدى قازاقپارات.

«3-14-اقپان ارالىعىندا بوكستان ازيا/وكەانيا ايماقتىق ىرىكتەۋ تۋرنيرى قىتايدىڭ ۋحان قالاسىندا ءوتۋى ءتيىس بولاتىن. اتالعان تۋرنيردە ەرلەر مەن ايەلدەردى قوسا ەسەپتەگەندە توكيو وليمپياداسىنا 63 ليتسەنزيا ساراپقا سالىناتىنى كۇتىلگەن. بۇگىن تاڭەرتەڭ اككرەديتاتسيادان وتكەن مەديا وكىلدەرىنە ارنالعان حاتتا ىرىكتەۋ تۋرنيرىنىڭ بەلگىسىز ۋاقىتقا اۋىستىرىلعانى ايتىلدى. ۇيىمداستىرۋ كوميتەتىنىڭ مالەمدەۋىنشە، ءارى قارايعى اقپاراتتى حالىقارالىق وليمپيادا كوميتەتى تاراتادى»، - دەلىنگەن ق ر ۇلتتىق وليمپيادالىق كوميتەتىنىڭ مالىمەتىندە.

جارىستىڭ كەيىنگە شەگەرىلۋىنە وسى كۇندەرى قىتايدا، سونىڭ ىشىندە ۋحان قالاسىندا بەلگىسىز پنيەۆمونيالىق ۆيرۋستىڭ ءورشۋى سەبەپ بولعان.

«ۋحان قالاسىندا پنيەۆمونيانىڭ اسقىنۋىنا سەبەپ بولعان كوروناۆيرۋستىڭ تارالۋىنا بايلانىستى، ادامداردىڭ دەنساۋلىعىنا نۇقسان كەلتىرمەۋ ماقساتىندا جەرگىلىكتى ۇيىمداستىرۋ كوميتەتى تۋرنيردى كەيىنگە قالدىرۋدى ءجون كوردى»، - دەلىنگەن حاتتا.

ايتا كەتەلىك، 2020-جىلعى توكيو وليمپياداسىنا ىرىكتەۋ تۋرنيرى جاڭا ەرەجە بويىنشا وتكىزىلەدى. وعان سايكەس، بوكسشىلار ءتورتجىلدىق دوداسىنا جولداما الۋ ءۇشىن قۇرلىقتىق ىرىكتەۋ دودالارىندا باق سىناۋ قاجەت. 2020-جىلدىڭ اقپانى مەن مامىرى ارالىعىندا بوكستان قۇرلىقتىق جانە الەمدىك ىرىكتەۋ تۋرنيرلەرى ۇيىمداستىرىلادى. افريكاداعى باسەكە 2020-جىلدىڭ 20-29- اقپانى ارالىعىندا داكاردا (سەنەگال)، ەۋروپاداعى ىرىكتەۋ سىنى 13-23- ناۋرىز كۇندەرى لوندوندا (ۇلى بريتانيا) وتەدى. امەريكالىقتار 23- ناۋرىز بەن 3- ءساۋىر ارالىعىندا بۋەنوس-ايرەستە (ارگەنتينا) جولداماعا تالاسادى. ال الەمدىك ىرىكتەۋ تۋرنيرى مامىر ايىندا فرانسيانىڭ پاريج قالاسىندا ۇيىمداستىرىلادى.