قىتايدا تاراعان بەلگىسىز ۆيرۋس ا ق ش-قا جەتتى

نۇر-سۇلتان. قازاقپارات – ا ق ش- تا ءبىر ادامنىڭ بەلگىسىز ۆيرۋستى جۇقتىرعانى انىقتالدى. بۇل – ا ق ش- تا تىركەلگەن ءبىرىنشى وقيعا.

ناۋقاس وتكەن اپتادا قىتايدان سيەتلگە ۇشىپ كەلگەن. دارىگەرلەر ونىڭ پنيەۆمونياعا شالدىققانىن ايتىپ وتىر. ارنايى سىناق اۋرۋعا شالدىعۋعا جاڭا كورونوۆيرۋس سەبەپشى بولعانىن دالەلدەدى.

امەريكانىڭ اۋرۋدى باقىلاۋ جانە پروفيلاكتيكا ورتالىعى جاقىن ارادا وسىعان ۇقساس وقيعالار قايتالانۋى مۇمكىن ەكەنىن ەسكەرتتى. 18- قاڭتاردان بەرى ا ق ش- تىڭ سان-فرانتسيسكو، لوس-انجەلەس جانە نيۋ-يورك قالالارىنىڭ اۋەجايلارى قىتاي ورتالىعىنان كەلەتىن اۋە رەيستەرىنىڭ جولاۋشىلارىن تەكسەرۋدى باستادى.

رەسمي دەرەك بويىنشا، قىتايدا بەلگىسىز ۆيرۋستان التى ادام كوز جۇمعان. بەلگىسىز دەرتكە شالدىققاندار سانى 300 گە جەتكەن. قىتايدا وسى اۋرۋدان قايتىس بولعاندار مەن ناۋقاستاردىڭ تۋىستارى مەن حالىقارالىق ساراپشى دارىگەرلەر سوزىنە سۇيەنگەن The Guardian باسىلىمى بەلگىسىز ۆيرۋستان زارداپ شەككەندەر سانى رەسمي مالىمەتتەگىدەن الدەقايدا كوپ بولۋى مۇمكىن دەپ بولجايدى.

ۆيرۋستىڭ قانداي جولمەن جۇعاتىنى ازىرگە انىقتالماعان. ساراپشىلاردىڭ سوزىنشە، ۆيرۋس ادامعا جانۋارلاردان جۇعۋى مۇمكىن، ادامنان ادامعا جۇعۋ مۇمكىندىگى دە جوققا شىعارىلمايدى. 19- قاڭتارعا دەيىن ۋحان قالاسىندا 198 ادام اۋىرىپ، ءۇش ادام ولگەن. تايلاندتا ءبىر، جاپونيادا ءبىر ادامنىڭ ۆيرۋس جۇقتىرعانى جايلى اقپارات تارادى.

ادەتتە كورونوۆيرۋس پنيەۆمونيانى قوزدىرادى. اۋرۋدى جەڭىلدەتەتىن ادىستەر بولعانمەن ۆيرۋستىڭ كوزىن جوياتىن امال تابىلعان جوق. بۇعان دەيىن بۇل دەرتكە شالدىققان ونداعان ادام اۋرۋدان ايىعىپ، اۋرۋحانادان شىققان.

22- قاڭتاردا دۇنيەجۇزىلىك دەنساۋلىق ساقتاۋ ۇيىمى ۆيرۋستىڭ تارالۋ ماسەلەسىن تالقىلايدى.

«ازاتتىق»