ۋكراينا پرەزيدەنتى گونچارۋك ۇكىمەتىنە تاعى ءبىر مۇمكىندىك بەردى
نۇر-سۇلتان. قازاقپارات - ۋكراينا پرەزيدەنتى ۆلاديمير زەلەنسكي الەكسەي گونچارۋكتىڭ پرەمەر-مينيستر قىزمەتىنەن بوساتۋ تۋرالى ءوتىنىشىن قاراستىرىپ، ۇكىمەتكە ءبىرقاتار شارتتى ورىنداعان جاعدايدا تاعى ءبىر مۇمكىندىك بەرۋگە شەشىم قابىلدادى، دەپ حابارلايدى قازاقپارات ۋكرينفورمعا سىلتەمە جاساپ.
ۋكراينا باسشىسى باسپا ءسوز قىزمەتىنىڭ حابارلاۋىنشا، ول بۇل جايىندا ەلدىڭ پرەمەر-ءمينيسترى الەكسەي گونچارۋكپەن كەزدەسۋى بارىسىندا مالىمدەگەن.
«بۇگىندە وتە ماڭىزدى ءارى قوعامىمىزدى الاڭداتىپ وتىرعان ءبىرقاتار ماسەلەنى شەشە الساڭىز، وندا ءسىزدىڭ ۇكىمەتىڭىزگە مۇمكىندىك بەرۋ تۋرالى شەشىم قابىلدادىم. ءدال قازىر مەملەكەتتى ەكونوميكالىق جانە ساياسي تۇرعىدا شايقاتاتىن ۋاقىت ەمەس»، - دەدى ۋكراينا پرەزيدەنتى گونچارۋككە قاراتا.
بۇعان دەيىن ۋكراينا پرەمەر-ءمينيسترى الەكسەي گونچارۋكتىڭ وتستاۆكاعا ءوتىنىش جازعانىن حابارلاعان بولاتىنبىز.
«لاۋازىمعا پرەزيدەنتتىڭ باعدارلاماسىن ورىنداۋ ءۇشىن كەلگەن ەدىم. ول مەن ءۇشىن اشىقتىق پەن ادالدىقتىڭ ۇلگىسى سانالادى. الايدا، پرەزيدەنتكە دەگەن ءبىزدىڭ قۇرمەتىمىز بەن سەنىمىمىزگە كەز كەلگەن كۇدىك تۋدىرماۋ ءۇشىن وتستاۆكاعا ءوتىنىش جازىپ، ونى پارلامەنتكە شىعارۋ قۇقىمەن پرەزيدەنتكە بەردىم»، - دەپ جازعان ەدى الەكسەي گونچارۋك Facebook پاراقشاسىندا.
