اقتوبەدە مۇعالىمنەن تۋبەركۋلەز انىقتالىپ، وقۋشىلار جاپپاي تەكسەرىلە باستادى

قازىر مەكتەپتە زالالسىزداندىرۋ شارالارى جۇرگىزىلىپ، وقۋشىلار جاپپاي مەديتسينالىق تەكسەرۋدەن ءوتىپ جاتىر، دەپ حابارلايدى قازاقپارات ءتىلشىسى.

بەسقوسپا اۋىلىندا 400 دەن استام تۇرعىن بار. مەكتەپتە 100 گە جۋىق وقۋشى ءبىلىم الادى، 28 مۇعالىم ساباق بەرىپ، 10 كىشى قىزمەتكەر ەڭبەك ەتەدى.

«مۇعالىمنەن تۋبەركۋلەز اۋرۋى انىقتالدى. مەكتەپكە ديزينفەكسيا جاسالىپ، پەداگوگتار تۇگەل تەكسەرۋدەن ءوتتى. ال وقۋشىلاردى كەزەڭ- كەزەڭىمەن دارىگەرلىك تەكسەرۋگە جىبەرىپ جاتىرمىز»، - دەدى شاعىن جيناقتى مەكتەپتىڭ ديرەكتورى رۇستەم قوجانازاروۆ.

انىقتالعانداي، جۇقپالى دەرتكە شالدىققان ۇستازدىڭ اياعى اۋىر. قازىر ول اۋرۋحانادا ەم قابىلداپ جاتىر.

«اقتوبە وبلىسى اكىمىنىڭ اتىنا ارىز تۇسۋىنە بايلانىستى كوميسسيا قۇرىلدى. قۇرامىندا وبلىستىق تاۋارلار مەن كورسەتىلەتىن قىزمەتتەر ساپاسى مەن قاۋىپسىزدىگىن باقىلاۋ دەپارتامەنتى، وبلىستىق تۋبەركۋلەز ديسپانسەرىنىڭ باس دارىگەرى، وبلىستىق ءبىلىم باسقارماسى مەن اۋداندىق قىزمەتكەرلەر بار. حالىقپەن، پەداگوگيكا قىزمەتكەرلەرىمەن كەزدەسۋ، ءتۇسىندىرۋ جۇمىستارى جۇرگىزىلدى»، - دەدى بەستاماق اۋىلدىق وكرۋگىنىڭ اكىمى قانات داۋلەتالين.

ايتا كەتەيىك، اتالمىش مەكتەپتە مۇعالىمنەن تۋبەركۋلەز سىرقاتى 2016 -جىلى دا انىقتالعان بولاتىن. سودان بەرى مەكەمە قىزمەتكەرلەرى جىلىنا ەكى رەت مەديتسينالىق تەكسەرۋدەن وتەدى.

بۇگىندە مەكتەپ قالىپتى جاعدايدا جۇمىس ىستەۋدە. مۇعالىمدەردىڭ بارلىعى تەكسەرۋدەن ءوتىپ، دەنساۋلىعى تۋرالى انىقتاما تاپسىردى. وقۋشىلاردى جەدەل جاردەم كولىگىمەن اۋدان ورتالىعىنا اپارىپ، تەكسەرۋ، رەنتگەنگە ءتۇسىرۋ جۇمىسى ءالى جالعاسىپ جاتىر.

اۆتور: التىناي ساعىندىقوۆا