قازاقستاندىقتار زاڭ جوبالارىن تالقىلاۋ بارىسىن ونلاين كورە الادى - سەناتور
بۇل تۋرادى قىزىلوردا وبلىسىنىڭ تۇرعىندارىمەن كەزدەسۋ بارىسىندا اتالمىش پالاتا دەپۋتاتى مۇرات باقتيار ۇلى ايتتى، دەپ حابارلايدى قازاقپارات.
پارلامەنت سەناتىنىڭ باسپا ءسوز قىزمەتىنەن ءمالىم ەتكەندەي، دەپۋتاتتار مۇرات باقتيار ۇلى مەن بەكمىرزا ەلامانوۆ جۇمىس بابىنداعى ساپارمەن قىزىلوردا وبلىسىنىڭ جالاعاش اۋدانىنداعى جالاعاش كەنتىندە جانە بۇقارباي باتىر اۋىلىندا، سونداي- اق سىرداريا اۋدانىنداعى سىرداريا كەنتىندە بولدى.
جۇزدەسۋدە سەنات جۇمىسىنىڭ اشىقتىعى تۋرالى ايتىلىپ، پالاتانىڭ جالپى وتىرىستارى مەن كوميتەتتەردىڭ كەڭەيتىلگەن وتىرىستارى تىكەلەي ەفيردە كورسەتىلەتىنى ايتىلدى.
«زاڭ جوباسىن تالقىلاۋ بارىسىن عالامتوردان بارشا قازاقستاندىقتار كورە الادى. وتكەن جىلى «پەداگوگ مارتەبەسى تۋرالى» جانە حالىقتىڭ دەنساۋلىعىنا قاتىستى زاڭدار حالىق اراسىندا كەڭىنەن تالقىلاندى. وسىنداي ماسەلەلەردى تالقىلاۋدا حالىقتىڭ پىكىرى، ۇسىنىسى ءبىز ءۇشىن ماڭىزدى. «پەداگوگ مارتەبەسى تۋرالى» زاڭ ۇستازداردىڭ ساپالى ءبىلىم بەرۋى جانە ولاردى ارتىق جۇكتەمەدەن ارىلتۋ ءۇشىن قابىلدانىپ وتىر. مۇعالىمدەردىڭ ار- نامىسىنا تيىسكەندەرگە قاتىستى جاۋاپكەرشىلىك كۇشەيتىلىپ، ءتيىستى مولشەردە ايىپپۇل تولەيتىن بولادى. ۇستازدار قاۋىمىن الەۋمەتتىك جاعىنان قامتاماسىز ەتۋ دە قولعا الىنىپ وتىر» ، - دەدى مۇرات باقتيار ۇلى.
ودان باسقا، ەلىمىزدە جول- كولىك وقيعالارىنىڭ جيىلەپ كەتۋىنە بايلانىستى ءبىرقاتار زاڭدارعا وزگەرىستەر ەنگىزىلدى. اتاپ ايتقاندا، كولىكتى ماس كۇيىندە باسقارعان ازاماتتار 10 جىلعا دەيىن كولىك جۇرگىزۋ قۇقىعىنان ايىرىلۋى مۇمكىن.
دەپۋتاتتار ايماقتى ارالاۋ بارىسىندا ي. توقتىبايەۆ اتىنداعى №35 مەكتەپ- ليسەيگە ارنايى بارىپ، اۋىل تۇرعىندارىمەن، مۇعالىمدەرمەن، مەديتسينا قىزمەتكەرلەرىمەن، اۋداندىق جانە وبلىستىق ءماسليحات دەپۋتاتتارىمەن، شارۋا قوجالىقتارىنىڭ وكىلدەرىمەن، سونداي- اق اۋىل اقساقالدارىمەن كەزدەستى.
سەناتورلار سونىمەن بىرگە تۇرمىستىق جانە كامەلەتكە تولماعاندارعا قاتىستى زورلىق- زومبىلىق، ناشاقورلىق، ادام ولىمىنە قاتىستى قىلمىستار ءۇشىن جاۋاپكەرشىلىكتى كۇشەيتۋ شارالارى تۋرالى ايتتى. جۇزدەسۋدە اۋىل تۇرعىندارىنىڭ ۇسىنىس- پىكىرلەرى تىڭدالدى. تۇرعىندار «پەداگوگ مارتەبەسى تۋرالى» زاڭ جوباسىنىڭ قابىلدانعانىنا ريزاشىلىعىن ءبىلدىرىپ، مىندەتتى الەۋمەتتىك مەديتسينالىق ساقتاندىرۋ، زەينەتاقى جانە ەڭبەكاقىعا قاتىستى ساۋالدار قويدى.
پالاتا وكىلدەرى كەزدەسۋدە ايتىلعان وزەكتى ماسەلەلەر باقىلاۋدا بولاتىنىن ايتىپ، ماڭىزدى تاقىرىپتار پارلامەنت سەناتىندا تالقىلاناتىنىن جەتكىزدى.
