ۋكراينانىڭ قاۋىپسىزدىك كەڭەسى: يراندا قۇلاعان ۇشاق تۋرالى ءوز بولجامدارىن اتادى

كەڭەس حاتشىسى الەكسەي دانيلوۆ ۇشاققا رەسەيدە جاسالعان «تور» زەنيتتىك-راكەتكالىق كومپلەكسىنەن جىبەرىلگەن زىمىران ءتيۋى مۇمكىن دەگەن بولجام ايتتى.

دانيلوۆتىڭ سوزىنشە، ۋكراينالىق ساراپشىلار ۇشاقتىڭ اپاتقا ۇشىراۋىنىڭ ءتورت سەبەبىن قاراستىرادى. ولار: زىمىرانمەن اتىپ ءتۇسىرۋ، ۇشقىشسىز ۇشاقپەن سوقتىعىسۋ، ۇشاق موتورىنىڭ جانۋى نە بورت ىشىندەگى تەراكت.

دانيلوۆ تەگەرانعا جەتكەن ۋكراينالىق ماماندار قازىر يران بيلىگىمەن ۇشاق اپاتقا ۇشىراعان جەرگە بارۋ جاعىن اقىلداسىپ جاتىر. ولار اۋەجاي ماڭىنان «تور» زەنيتتىك-راكەتكالىق كومپلەكسىنىڭ سىنىقتارىن ىزدەمەك.

باتىستاعى ارنايى قىزمەتتەر 9- قاڭتاردا Reuters اقپارات اگەنتتىگىنە ۇشاق تەحنيكالىق اقاۋ سالدارىنان اپاتقا ۇشىراعانىن ايتقان. كانادالىق ارنايى قىزمەتتەگى دەرەككوز ۇشاقتىڭ موتورى جانىپ كەتۋى مۇمكىن دەگەن.

9- قاڭتاردا يران بيلىگى ۇشاق موتورى جانىپ، پيلوتتار ۇشاققا يە بولا الماي قالۋى مۇمكىن دەگەن بولجام جاسادى. تەگەراننىڭ مالىمدەۋىنشە، «ۇشاق راداردان جوعالىپ كەتكەندە 2500 مەتر بيىكتىكتە بولعان. پيلوتتار ەشقانداي توتەنشە جاعداي جايلى حابارلاماعان، ءبىراق قايتا اۋەجايعا ورالۋعا تىرىسقان».

ينتەرنەتتە تاراعان ۆيدەولاردا ۇشاقتىق اۋەدە ورتەنە باستاعانى كورىنەدى.

ۋكراينانىڭ يرانداعى ەلشىلىگى 8- قاڭتاردا ۇشاق موتورداعى اقاۋدان اپاتقا ۇشىرادى دەپ حابارلاعان. ءبىراق ەلشىلىك ءبىراز ۋاقىتتان سوڭ بۇل حابارلامانى الىپ تاستادى «ۇشاقتىڭ اپاتقا ۇشىراۋىنا بارلىق سەبەپتى قاراستىرامىز» دەپ مالىمدەدى.

8- قاڭتاردا تەگەراننان كيەۆكە ۇشىپ شىققان ۋكراينالىق جولاۋشىلار ۇشاعى اپاتقا ۇشىراپ، بورتىنداعى 176 ادامنىڭ ءبارى قازا تاپقان. ۋكراينا سىرتقى ىستەر ءمينيسترى ۆاديم پريستايكونىڭ سوزىنشە، ۇشاقتا 82 يراندىق، 63 كانادالىق، 10 شۆەد، 4 اۋعان، 3 بريتاندىق جانە گەرمانيانىڭ 3 ازاماتى بولعان. ۋكراينا قاۋىپسىزدىك قىزمەتى اپات سالدارىنان قازا تاپقان 11 ۋكرايندىقتىڭ اراسىندا ەكيپاجدىڭ توعىز مۇشەسى بار دەپ حابارلادى.

«ازاتتىق»