يران ۋكراينالىق ۇشاقتى قاتەلەسىپ اتىپ تۇسىرگەن بولۋى مۇمكىن - كانادانىڭ پرەمەر-ءمينيسترى
نۇر-سۇلتان. قازاقپارات - كانادانىڭ پرەمەر-ءمينيسترى دجاستين تريۋدو يراندا قۇلاعان ۇشاقتىڭ زىمىرانمەن اتىپ تۇسىرىلگەنى تۋرالى كوپتەگەن دالەلدەمەلەر مەن اقپاراتتىڭ بار ەكەنىن مالىمدەدى، دەپ حابارلايدى قازاقپارات BBC-گە سىلتەمە جاساي وتىرىپ.
ول يراندى سارسەنبىدە تەگەران ماڭىندا ۋكراينالىق ۇشاقتىڭ اپاتقا ۇشىراۋىنا كىنالى دەپ ايىپتادى.
«بىزدە ۇشاقتى يراندىق زىمىران اتىپ تۇسىرگەنى تۋرالى كوپتەگەن دەرەك كوزدەرى بار. مۇنى قاتەلەسىپ جاساۋى دا مۇمكىن»، - دەپ ءمالىم ەتتى دجاستين تريۋدو.
اۋە اپاتىنان كانادانىڭ 63 ازاماتى كوز جۇمدى.
تريۋدونىڭ ايتۋىنشا، بوينگتىڭ اپاتقا ۇشىراۋىنا قاتىستى سۇراقتارعا جاۋاپ بەرۋدى كانادا تالاپ ەتەدى. ول قايعىلى جاعدايدى جان-جاقتى تەكسەرۋگە شاقىردى.
تريۋدودان كەيىن ۇلى بريتانيا پرەمەر-ءمينيسترى بوريس دجونسون دا وسىنداي مالىمدەمە جاسادى.
بۇعان دەيىن امەريكالىق ب ا ق پەنتاگونداعى جانە امەريكا مەن يراك بارلاۋىنداعى اقپارات كوزدەرىنە سىلتەمە جاساي وتىرىپ، سارسەنبىدە تەگەرانعا جاقىن جەردە قۇلاعان ۋكراينالىق ۇشاقتى يراندىق اۋە قورعانىس زىمىرانى قاتەلەسىپ اتىپ تۇسىرگەنىن حابارلاعان بولاتىن.
ەسكە سالا كەتەيىك، بەيسەنبىدە ا ق ش پرەزيدەنتى دونالد ترامپ اپاتتىڭ سەبەبى تەحنيكالىق اقاۋ سالدارى ەكەنىنە سەنبەيتىنىن ايتتى.
يراندىق ازاماتتىق اۆياتسيا باسقارماسىنىڭ باسشىسى الي ابەدجادەح ب ا ق- تا تارالعان يراندىق زىمىران تۋرالى اقپاراتتى قيسىنسىز قاۋەسەت دەپ اتادى.
