بالانى ەس-ءتۇسسىز حالگە تۇسىرگەن ەمحانانى جابامىز - مينيسترلىك

بۇل تۋرالى ق ر دەنساۋلىق ساقتاۋ مينيسترلىگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى ءتوراعاسىنىڭ ورىنباسارى لاۋرا احمەتنيازوۆا ايتتى، دەپ حابارلايدى قازاقپارات ءتىلشىسى.

«تەكسەرۋ بارىسىندا ءدارى-دارمەكتەر مەن مەديتسينالىق بۇيىمداردى ساقتاۋ تالاپتارىنىڭ بۇزىلعاندىعى انىقتالدى. اتاپ ايتقاندا، ءدارى- دارمەكتەردى ساقتاۋعا ارنالعان قويما تەمپەراتۋرانى، اۋا ىلعالدىلىعىن باقىلاۋعا ارنالعان جابدىقتارمەن قامتاماسىز ەتىلمەگەن. ءدارى- دارمەكتىڭ كەرى اسەرىنە مونيتورينگ جاساۋ جونىندەگى جاۋاپتى تۇلعا بەكىتىلمەگەن. اتالعان كلينيكادا قولدانىلاتىن مەديتسينالىق جابدىقتاردى تەكسەرۋ تۋرالى سەرتيفيكات جوق»، - دەدى ول.

ونىڭ اتاپ وتۋىنشە، تەكسەرۋ قورىتىندىسى بويىنشا، انىقتالعان زاڭبۇزۋشىلىقتاردى جويۋ تۋرالى ۇيعارىم بەرىلىپ، ماتەريالدار نۇر- سۇلتان قالالىق پوليتسيا دەپارتامەنتىنە مەديتسينالىق قىزمەتكەرلەردىڭ ارەكەتتەرىنە قۇقىقتىق باعا بەرۋ ءۇشىن جونەلتىلگەن.

«سونىمەن قاتار ءبىز سوت ورگاندارىنا اتالعان كلينيكانىڭ جۇمىسىن توقتاتۋ تۋرالى تالاپ ءوتىنىش دايىنداپ جاتىرمىز. سەبەبى مۇنداي جاعداي 2018 -جىلدىڭ قاراشاسىندا جانە 2019 -جىلدىڭ مامىرىندا وسى كلينيكادا انىقتالعان ەدى. سول كەزدە انەستەزيولوگيالىق-رەانيماتسيالىق كومەك كورسەتۋ ستاندارتتارى ساقتالماعاندىعى، دارىگەرلەردە سەرتيفيكاتتىڭ جوقتىعى انىقتالعان بولاتىن. وسىعان وراي بۇزۋشىلىقتاردىڭ جۇيەلىلىگىن ەسكەرە كەلە سوت ورگاندارىنا اتالعان كلينيكانىڭ قىزمەتىن توقتاتۋ تۋرالى ماتەريال دايىندايمىز»، - دەدى لاۋرا احمەتنيازوۆا.

ل. احمەتنيازوۆا بۇعان دەيىن حابارلاعانداي، ستوماتولوگياعا تەكسەرۋ جۇمىستارى كەشە، 8-قاڭتار كۇنى اياقتالدى. «ناتيجەسىندە بىرنەشە زاڭبۇزۋشىلىقتى انىقتادىق. ولاردىڭ باستىلارى - سيەۆوفلۋران پرەپاراتىمەن جاسالعان جالپى انەستەزياعا قوسا، 4 جاسقا دەيىنگى بالالارعا ەگۋگە بولمايتىن، مەپيۆاستەزين جەرگىلىكتى انەستەزيا پرەپاراتى قولدانىلعان»، - دەدى ول.

سونىمەن قاتار بالانى ەمدەمەستەن بۇرىن اللەرگياعا قارسى سىناما دا الىنباعان. انەستەزيولوگ- رەانيماتولوگ دارىگەر جالپى ناركوز بەرۋگە 15 مينۋت قالعاندا عانا بالانى تەكسەرگەن. ال ستاندارتقا سايكەس دارىگەر پاتسيەنتتى بولجالدى وتا جاسالاتىن ساتتەن كەمىندە 24 ساعات بۇرىن قاراۋى ءتيىس.

ەسكە سالايىق، ەلوردا تۇرعىنى اناستاسيا زەلەنايا ەكى جارىم جاستاعى بالاسى ستوماتولوگيالىق كلينيكاعا قارالعاننان كەيىن ەس-ءتۇسسىز كۇيگە تۇسكەنىن حابارلاعان بولاتىن. بالا 11 تاۋلىكتەن بەرى ەسىن جيا الماي جاتىر.

وقيعاعا بايلانىستى دەنساۋلىق ساقتاۋ ءمينيسترى ەلجان ءبىرتانوۆ تۇسىنىك بەردى. «جاعدايدى باقىلاۋىمدا ۇستاپ وتىرمىن. وكىنىشكە قاراي، بالانىڭ جاعدايى وتە اۋىر. ءبىراق، دارىگەرلەر تاراپىنان مەديتسينالىق كومەك بارىنشا كورسەتىلۋدە. وعان تولىققاندى دەڭگەيدە جاردەم بەرىلەدى»، - دەدى مينيستر.

سونىمەن بىرگە، ول ق ر د س م تاۋارلار مەن قىزمەتتەر قاۋىپسىزدىگى جانە ساپاسىن باقىلاۋ كوميتەتىنىڭ ءتورايىمى ليۋدميلا بيۋرابەكوۆاعا اتالمىش ستوماتولوگيالىق كلينيكانى تەكسەرۋدى تاپسىرعان ەدى.

اۆتور: مارلان جيەمباي