الماتىدا كوشپەلى ساۋدا ورىندارىنىڭ ورنالاسۋىنا دا تالاپتار قويىلاتىن بولدى

بۇل تۋرالى بۇگىنگى بريفينگ بارىسىندا «الماتى دامۋ ورتالىعى» ا ق باسقارما ءتوراعاسى سانجار ىزتىلەۋوۆ ايتتى، دەپ حابارلايدى قازاقپارات ءتىلشىسى.

«بۇل ەرەجەلەنىڭ بەكىتىلۋى قالانىڭ ساۋلەتتىك كەلبەتىن جاقسارتۋعا، تۇرعىنداردىڭ قاجەتتىلىگىنە قاراي كوشپەلى ساۋدا نىساندارىن ورنالاستىرۋعا مۇمكىندىك بەرەدى. سالىق ءتۇسىمى كوبەيىپ، كولەگەيلى ەكونوميكانىڭ كولەمىن ازايتادى. بۇل ءوز كەزەگىندە شاعىن جانە ورتا كاسىپورىندار ءۇشىن بيزنەس كليماتتى جاقسارتۋعا مۇمكىندىك بولماق»، - دەدى قالا اكىمىنىڭ ورىنباسارى مۇحيت ازىربايەۆ.

ەڭ باستىسى بۇل نىسانداردى ورنالاستىرۋدا بالاما ساۋدا ورىندارىنىڭ جوقتىعى، ينجەنەرلىك جەلىلەردىڭ بولعانى، جاياۋ جۇرگىنشىلەر مەن كولىككە كەدەرگى كەلتىرمەۋى ەسكەرىلەتىن بولادى.

شاعىن جانە ورتا كاسىپورىندارعا قالا قۇرىلىسى ەرەجەلەرى مەن ديزاين كود اياسىندا ارنايى ۇسىنىس بەرىلەدى. سوندىقتان، كاسىپكەرگە ەسكيزدى بەكىتۋ ءۇشىن قۇزىرلى ورگاندى جاعالاپ تابان توزدىرۋدىڭ قاجەتتىلىگى بولمايدى.

«الماتى بيزنەستى جۇرگىزۋ مەن ءومىر سۇرۋگە ىڭعايلى قالا بولۋى ءتيىس. جاز، كۇز مەزگىلىندە ادامدار سىرتتا وتىرىپ تاماقتانعىسى كەلەدى. جازعى تاماقتانۋ ورىندارى ساۋلەت نورمالارىنا ساي جاسالۋى ءتيىس»، - دەدى قالا اكىمىنىڭ ورىنباسارى.

سانجار ىزتىلەۋوۆ اتالعان ۇسىنىستاردىڭ بارلىعى الماتى قالالىق كاسىپكەرلەر پالاتاسىندا تالقىلاناتىنىن ايتتى.

ايتا كەتۋ كەرەك، ق ر پرەزيدەنتى قاسىم-جومارت توقايەۆتىڭ جولداۋىندا ۇكىمەتكە ءۇش ءىرى قالانىڭ اكىمدىكتەرىنىڭ قۇزىرىن كەڭەيتۋ تۋرالى تاپسىرما بەرىلگەن بولاتىن.

اتاپ ايتقاندا، ولارعا قالا قۇرىلىسى ساياساتى، كولىك ينفراقۇرىلىمى، ساۋلەتتىك كەلبەتىن وزگەرتۋگە قۇزىرىن كەڭەيتۋ تۋرالى ايتىلعان. جولداۋدان سوڭ ق ر ۇلتتىق ەكونوميكا مينيسترلىگى مەن مەملەكەتتىك ورگاندار بىرلەسە وتىرىپ ق ر ۇكىمەتىنە ۇسىنىستار بەردى. وسىلايشا 28 -جەلتوقساندا مەملەكەت باسشىسى ءتيىستى جارلىققا قول قويىپ، «الماتى قالاسىنىڭ ەرەكشە مارتەبەسى تۋرالى زاڭ» قابىلداندى.

اۆتور: گۇلميرا عوسمانالي